Жалған ақпаратқа кімдер көп сенеді: Маман адамдардың неге мұндай жаңалықтарды тарататынын және фейктен сақтанудың жолдарын айтты, деп жазады stan.kz сайтына сілтеме жасаған 4tagan.kz ақпараттық агенттігі.
Адамдар ақпараттың жетіспеушілігінен және ресми деректерге сенбеу әдетінен кейін фейк (жалған) ақпараттарға сеніп қалады. Психолог Балабек Кеніштайұлы адамдардың жалған жаңалықтарға бейімділігі әртүрлі болуы мүмкін екенін ескеруді ұсынады. Маман неге адамдардың әлі күнге дейін ғаламтордағы сенімсіз ақпараттарға сенуінің себебі мен одан қорғанудың жолдарымен бөлісті.
Психолог адамдар өздерінің бұрыннан келе жатқан сенімдеріне қайшы келетін ақпаратқа тап болған кезде, олар когнитивті диссонансты сезінуі ықтимал екенін айтады. Бұл дискомфорттан арылу үшін олар жалған болса да, қазіргі сенімдеріне сәйкес келетін ақпаратты қабылдап, өзгелермен бөлісуге ұмтылып тұрады, деп түсіндіреді маман.
Ол сонымен қоса адамдарға басқа адамдардың әрекеттері әсер ететінін және егер әлеуметтік желідегі басқа пайдаланушылар жалған жаңалықтармен бөлісетін болса, адамдар ақпаратты сыни бағалаудың орнына өзгелердің қателігін қайталайтынын айтты.
“Кейде шектен тыс сенімділік адамдарды жалған жаңалықтарды қабылдап, оның ақ-қарасын ажыратпай бөлісуіне итермелейді”, – дейді маман.
Психолог өз кезегінде дүниетанымына сәйкес келетін жалған жаңалықтармен бетпе-бет келгенде адамдар оны оңай қабылдайтынны айтады. Ол сондай-ақ жалған жаңалықтардың танымал түрлерін атап өтті.
Ақпараттың үздіксіз келуі. Әр секунд сайын назар аударатын жаңа пост, хабарлама немесе жаңалықтар пайда болып отырады. Сондықтан көптеген адамдар әлеуметтік желілерде көргендері туралы ойлауға көп уақыт жұмсамайды.
