Жаһанның дамуы үйде отырып-ақ, жасанды интеллектінің (ЖИ) көмегімен кез келген ақпаратты лезде табуға жағдай жасауда. Заманауи әлемнің ажырамас бөлігіне айналған жасанды интелекттің ықпалы артқан сайын, қауіпі де көбеюде. Ол арқылы жеке тұлғалар туралы ақпаратты біліп алып, алаяқтықпен айналысатындар да жиі кездеседі. Мұндай ақпараттарды соңғы кезде бұқаралық ақпарат құралдарының беттерінен жиі оқып, естіп жүрміз.
Ішкі істер министрлігінің мәліметі бойынша, Қазақстанда соңғы жеті жылда интернет-алаяқтық саны 10 есеге, яғни 2 мыңнан 20 мың қылмысқа дейін өскен. Былтырдың өзінде интернет-алаяқтар азаматтарға 17,5 млрд теңгеден астам шығын келтірген. Ғаламтордағы әккілердің көмекші құралына айналған жаны жоқ, бірақ миы көп жасанды интеллект дегеніміз не? Бұл туралы Адырна порталына сілтеме жасаған 4tagan.kz ақпараттық агенттігі жазады.
Жасанды интеллектінің пайдасы мен зияны туралы «Адырна» ұлттық порталына ІТ маманы Мейіржан Әуелханұлы айтып берді.
«Жасанды интеллект дегеніміз – адамның ойын, іс-әрекетін компьютерде бейнелейтін компьютерлік жүйе. Яғни, адамзаттың жетістігі. Жасанды интеллект әдетте үйрену, шешім қабылдау, тілді тану, сөйлесу, көру және проблемаларды шешу сияқты адамдық ақыл-ой қызметтерін жасауға бағытталған. Ол дамыған сайын, күрделі міндеттерді орындауға, деректерді талдауға және өздігінен оқуға қабілетті болып келеді.», — деді ІТ маманы.
Сондай-ақ, ядролық энергияны бейбіт және деструктивті мақсаттар үшін пайдалануға, мұнай өндірудегі энергетикалық мәселелерді шешу және жаңа материалдарды синтездеу үшін шикізат алу сынды адамзаттың өмірін өзгерткен өнертабыстар – жасанды интеллект арқылы жүзеге асады. Дегенмен, ғалымдардың біраз бөлігі жасанды интеллекттен қауіп көреді.
Фото:techeela.com
