Ғаламтордағы әккілердің көмекші құралына айналған жаны жоқ, бірақ миы көп жасанды интеллект дегеніміз не? Бұл туралы Адырна порталына сілтеме жасаған 4tagan.kz ақпараттық агенттігі жазады.
Ал жасанды интеллектті пайдаланып, жалған ақпарат тарататындардың жазасы қандай болмақ? Қылмыстық кодексте қандай жаза көзделген? Бұл туралы заң ғылымдарының кандидаты, адвокат Роза Өміртай айтып берді.
«Жалған ақпарат таратқандарға Қазақстан Республикасының заңдамаларына сәйкес, әкімшілік және қылмыстық жауапкершілік қарастырылған. Яғни, әкімшілк құқық бұзушылық кодексіне және Қылмыстық кодекске сәйкес жауапқа тартылады. Жалған ақпарат қоғамда резонанс тудырса, халықты жалған ақпаратпен иландырып, халықтың біраз бөлігі зиян шегетін болса, 20 АЕК сомасындағы айыппұл төлеуден бастап, 7 жылға бас бостандығынан айыруға дейінгі жаза көзделген. Қазақстан Республикасының Қылмыстық кодексінің 274-бабына сәйкес жалған ақпарат таратқаны үшін жазаға тартылады. Жасанды интеллект ІТ маманының айтуынша, үнемі дұрыс ақпаратты бере бермейді. Ол ғаламторда жиналған шын-өтірігі аралас ақпараттың барлығын бір жүйеге топтастырады.
Жалпы жалған ақпарат тараған жағдайда, егер әлеуметтік желіде тараса, әлеуметтік желіде кешірім сұрау арқылы қалыпқа келтіреді. Ал ақпарат көзі арқылы жалған ақпарат тараса, сол ақпарат көзі бойынша, кешірім сұрау арқылы болған құқық бұзушылықтың орнын толтыра алады. Бұл халықаралық құқықта да осындай тәжірибемен жүзеге асады. Егер бір мемлекетті басқа мемлекет жалған ақпарат таратып, абыройын төгіп жатса, дәл сол дереккөз арқылы кешірім сұрап, олқылықтың орнын толтыру керек. Айыппұл салу , қоғамдық жұмысқа тарту, бас бостандығынан айырылтуға дейін барады», — деді заңгер.
