Еуропа көшелеріндегі «таңғы жаңалықтар, газета!» деген балалардың дауысы адамзат баласын ақпарат әлеміне алып келді. Турасында осылай, бұрындары қала көшелерінде ілінетін хан жарлықтарынан бастап, ел ішіндегі ауыс-түйіс жаңалықтар арнайы ақпарат парақтары болып бірігіп, «газет» атауымен бұқараға ұсынала бастады. Сол уақыттан бастап ақпарат әлемі дүркін-дүркін өзгерістерге ұшырап, жаңалықты жеткізу құралдары да, беру тәсілдері де тым қатты өзгерді. Бір уақыттары дауыстық хабарлама таратуға мүмкіндік берген радионың өмірге келуі де ескірместей көрінген еді. Алайда ақпаратқа аш қоғам үшін тек дауысын тыңдап қою жеткіліксіз болды. Өнертапқыштар бейнелі, сұлбалы ақпарат таратуды көздеді һәм мақсатына жетті. Бұл теледидардың өмірге келген тұсы еді. Ал бүгінде медиа кеңістік үшін жаңалық – масс-медиа.
Бүгінде елімізде журналистика саласы жаңа платформаларға бет бұрып, заманауи технологияларды қолдануда. Нақтырақ айтқанда, телеарналар тек көк жәшікпен ғана халыққа ақпарат таратпай, әлім желідегі ресми парақшалары арқылы да көрерменге жедел жаңалықтар таратуда. Бұл ретте, Digital marketing бойынша бүкіл мүмкіндіктер қарастырылып келеді. Журналистердің күнделікті жаңалықтар жариялап, ақпарат беріп, репортаж таратуына және бөлісуіне ғаламтор көп мүмкіндік берді. Осы тенденцияның дамуы арқылы төртінші билік өкілдері әмбебап журналистке айналуда. Қазір әлемде журналистер мен аудитория арасын Facebook, Twitter және Instagram секілді қосымшалар байланыстыруда. Ал елімізде бұл тізімге Tik Tok желісі қосылады. Сонымен қатар, Telegram желісі де қарқынды өсіп, белсенді желілердің біріне айналды.
Ақпаратты сүзгіден өткізу, саралау — медиа саласындағы қызметкерлер жұмысының құрамдас бөлшегі болғанымен де, фактчекинг қабілетін меңгерудің маңызы артып, медиасауаттылықтың ажырамас бөлгешіне айналды.
