Қазіргі таңда әлеуметтік желілердің көптігі соншалық, кейбірі жабылды дегенімен атауын, формасын өзгертіп, түрленіп жаңа күйде ақпаратт таратуда, оқырман жинауда. Түрлі әлеуметтік желі қолданушылары көрген және естіген контентке сыни көзқараспен қарамай, жай ғана қауесеттерге, фейктерге, айла-шарғыларға бақылаусыз сенетін болса, мұның қоғамға қандай салдары болатыны белгісіз дейді медиа сарапшы, журналист Есенгүл Кәпқызы, деп хабарлайды «NewTimes.kz» ақпарат агенттігіне сілтеме жасаған 4tagan.kz.
Әлеуметтік желілердің негізгі проблемаларының бірі — олардың үнемі қол жетімділігі және тоқтаусыз қабылданатын ақпарат ағыны. Әлеуметтік желінің өміріміздің ажырамас бір бөлігіне айналуы әртүрлі синдромның туындауына әкелді.
Есенгүл Кәпқызы медиасауаттандыруды мектептерден бастау керек деп есептейді. Желіде онлайн көп уақыт өткізетін балалар мен жасөспірімдерге мұндай білім қажет, өйткені әлеуметтік желіде әртүрлі қауіп-қатерге тап болып, күмәнді ұсыныстардан бастап алаяқтарға кезігуіңіз әбден мүмкін.
«Менің ойымша, мектеп бағдарламасына кем дегенде медиасауаттылық бойынша факультатив сабақтарды, мұғалімдерге арналған тиісті курстарды енгізу қажет. Ғаламтор сантүрлі ақпаратқа толы қазіргі заманда балаларға бәріне сенбей, сыни тұрғыдан ойлауды үйрету керек. Сыни көзқараспен қарайтын, идеологияға бой алдырмайтын ұрпақ тәрбиелеуіміз керек, бұл үдеріске үлкендердің де атсалысуы қажет», – дейді Есенгүл Кәпқызы.
Оның айтуынша: әлеуметтік желілерге тіркелмес бұрын ғаламторда басқа адамдарды қорлауға, ұлтаралық араздықты туындатпауға, желідегі пікірталаста қатысушылардың пікірін құрметтеуге, жеке басқа қол сұқпауға тыйым салатын тармақтарды қамтитын пайдалану ережелерін мұқият зерделеу қажет.
А.Болатова
