Оқырмандардың жалған ақпаратты тарқату бойынша пікірін жариялап отырмыз:
А.Куаныш: Бұл бүгінгі көзге көрінбейтін, бірақ көкейкесті мəселе. Жалған екендігін білместен осы хабарларды тарату арқылы қаншама адам бірін-бірі алдады. Сондықтан, мəселеге қатысты заңды күшейту керек деп санаймын. Өзгелерге сабақ болуы үшін де ақпараттың қайдан шыққанын анықтап, сол адамды жауапкершілікке тарту əлде қайда əділ болар еді.
Альфия: Мен көпбалалы анамын. Whats App арқылы тараған 25 жылдыққа 25 мың сыйақы туралы хабарламаны мен де оқыдым. Алайда, құжаттарымды рəсімдейін деп халыққа қызмет көрсету орталығына хабарласқанымда ғана мұның жалған екенін бір білдім. Ақпараттың анығына көз жеткізбей тұрып сенуге болмайды екен. Бұл жағдайдан соң əлеуметтік желілердегі жаңалықтарға мүлде сенбейтін болдым.
Сабыр: Жалған ақпарат таратқандар қатаң жазалануы қажет. Елді дүрліктіру -ақылға қонымсыз!
Т.Қабесов: Әлеуметтік желілерде жазылғанның барлығын шынайы ақпарат деп қабылдауға әсте болмайды. Дегенмен, жастар ақпаратты тексермей, бір-біріне, одан қалса, оны үйдегі ата-анасына жеткізеді. Осының нәтижесінде ел ішіне неше түрлі араздастыратын, бұқараны билікпен шағыстыратын жалған ақпараттар таралады. Оның ішінде, діни мазмұндағы мәліметтерге сақ болған жөн.
Н.Аманғали: Программист маман ретінде айтарым, халық Фактчекинг дегеннің барын біле бермейді. Ол әлеуметтік желіде кез-келген ақпаратты қалың оқырманға таратпас бұрын бірінші тексеруді талап етеді. Яғни, сараптап, талдап, интернеттегі сілтемелерін нақтылап, ақпараттың шыққан түпнұсқасын анықтау.
