Ауыл тұрғындарының кәсіпкерлік бастамаларын қолдау арқылы ауыл тұрмысын түзеу – «AMANAT» партиясы бастамашыл болған бірегей жоба – «Ауыл аманатының» басты міндеті. Түркістан облысы еліміз бойынша халық саны ең көп өңірлердің бірі және облыс халқының басым бөлігін ауыл тұрғындары санатына жататын әлеуметтік топ құрайды.
Сегіз жүзден астам елді мекендері бар Түркістан облысы ауылдар саны жөнінен республикада көш бастап тұр. Ауыл тұрғындарының табысын арттыру – өңіріміз үшін ең әуелгі басымдық болып белгіленген. Мемлекет басшысының тапсырмасымен былтыр ғана іске қосылған «Ауыл аманаты» жобасымен 2029 жылға дейінгі кезеңде республика бойынша 1 миллионнан астам ауыл тұрғындарына қолдау көрсету межеленген. Жобаны іске асыруға 1 трлн. теңге бағытталып, ауыл-аймақтарда 350 мыңнан астам жаңа жұмыс орындарын құру көзделген.
Тәуекел – тау жығар дейтін ұстаным өз ісін дөңгелетіп, кәсіп бастаймын деген адамның ең басты сенімі әрі тірегі. Мақтаралдық тұрғын Көбжан Торбиев жеке ісін бастауға бел буып, нарықтағы сұранысты асықпай зерделеді. Қолдан келер икемін дұрыс қолданудың жолдарын іздей бастады. Бойында ептілігі бар шеберлік өнерін кәдеге жаратудың түрлі қисынын қарастырып, екінің бірі атқара бермейтін жалқы кәсіпке бет бұруға ұйғарды.
Ауылдан шыққан алғыр азамат тамам қазақ үшін қасиетті қарашаңырақ – киіз үйді жаңғырту ісін қолға алуға бел буады. Түп тамырымыз – көшпенділер мәдениетінің жарқын мұрасы боп қалған киіз үйдің әрбір элементі қазақ халқының рухымен ұштасып жатқанын тереңінен ұғынды. Киіз үйдің керегесі еліміздің кеңдігін білдіретінін, шаңырақ – күн астындағы ашық аспанымыздың нышаны екенін, ал кереге мен шаңырақты тұтастырып тұрған уықтар – еліміздің әрбір азаматының мемлекеттің тірегі болуға талпынысын бедерлейтінін жан-тәнімен сезінді.
«Ауыл аманатының» шапағатымен Бескетік ауылында ашылған киіз үй шеберханасының жұмысы қазір қызу қайнаған. Тапсырыс бергендердің сенім үдесінен шығуда мұнда шеңберден шаңырақ жасап, тор көзді кереге, әшекейлі есік, ою-өрнекті жабынды киіздер дайындалуда. Киіз үйдегі сәндік құралдардың қатарында туырлық және жапқылар, өрнекті баулар, ақ және ала басқұрлар, жел бау, бас бау, уық бау сынды көнеден келе жатқан сәндік элементтер қолданылуда.
Ерекше сипаты бар, халық сұранысына ие мұндай кәсіптерді жаңғыртуда «Ауыл аманаты» жобасының тиімділігі зор деп білеміз. Ауыл тұрғындарын ауылдағы алуан түрлі тіршілік тынысын табыс табуға бағдарлап, мемлекет беріп отырған бірегей мүмкіндікті пайдалануға шақырамыз.
