Өткен жылы Келес ауданындағы Біртілек ауылдық округінің орталығынан 300 орындық білім ошағының құрылысы басталды. Аталған құрылыс нысаны «Жайлы мектеп» пилоттық ұлттық жобасы аясында бой көтеруде. Білім нысаны келер жылдың екінші жартыжылдығында қолданысқа берілмек. Мектеп пәндік кабинеттермен, оның ішінде робототехника, кең жолақты интернет, жаңа модификацияланған бөлмелермен жабдықталып, оқушылардың сапалы білім алуларына, түрлі үйірмелерге қатысуына, спортпен айналысуларына, жоғары және бірінші санатты мұғалімдер құрамының пайыздық үлесін, педагогикалық қызметкерлердің біліктіліктерін арттыруға толықтай жағдай жасалатын болады. Бұл туралы Келес ауданы әкімінің м.у.а. Алмас Сексенбаев Біртілек ауылдық округінің тұрғындарымен кездесуінде мәлімдеді.
Кездесуде Біртілек ауылдық округінің елді мекендерін дамыту, әлеуметтік нысандар санын арттыру, инфрақұрылым мәселелері жөнінде сөз қозғалып, тұрғындардың сұрақтарына жауап берілді. Алдағы жылы Біртілек елді мекенінде мәдениет үйі салынуы жоспарланса, Жолбасшы, Біртілек, Еңбекші елді мекендері арқылы өтетін облыстық маңызы бар жолдың бойына аяқжол және көше жарықтандыру бағаналарын орнату бойынша Түркістан облысының жолаушылар көлігі және автомобиль жолдары басқармасына ұсыныс берілді. Сондай-ақ, тұрғындар сұранған мәселенің бірі Амангелді елді мекеніндегі тозығы жеткен электр желілері мен бағаналарын ауыстыру және КТП орнату жұмыстары атқарылуда.
