Келес ауданының әкімі Жәнібек Ағыбаев өңірдегі ауыл, ауылдық округтері әкімдерінің өткен жылы атқарған жұмыстарының есебін тыңдап, берілген тапсырмалардың орындалуы мен жергілікті тұрғындардың әл-аухатын арттыру бағытында істелген жұмыстарды талқылады. Алдымен Алпамыс батыр ауылдық округінің әкімі Ерлан Әділханов округтің әлеуметтік-экономикалық даму бойынша атқарылған жұмыстарды баяндады.
— Алпамыс батыр ауылдық округінде 6 482 адам тұрады. Өткен жылы 2 шақырымды құрайтын Қауыншы елді мекеніндегі Қажымұқан көшесіне тас шағал төселсе, Т.Тәжібаев көшесіне асфальт төсеу жұмыстары жүргізілді. Ал Ақжол ауылының Жеңіс, Мерей, Ш.Қалдаяқов, С.Сейфуллин, Жастар және Бейбітшілік көшелері «Ауыл ел бесігі» бағдарламасы аясында орта жөндеуден өтті. Жөндеу жұмыстары биылғы жылға өтпелі болып, ауылдық округінің орталығы толығымен асфальтталады. Сонымен қатар, шаруаларымыз 759 гектар жерге ашық алқаптан жылына 2-3 өнім алу мақсатында түрлі дақылдарды егіп, өнімдерін еліміздің және шет мемлекеттердің ірі қалаларына экспорттады. Ал өткен жылдың тамыз айында аудан әкімінің есебінде көтерілген өзекті мәселелердің бірі «Ер-тайыр» және «Ұлы дала» АӨК-не конкурс арқылы жалпы 120 га суармалы жерлер берілді. Осы аталған жерлерге кооператив мүшелері тарапынан бау-бақша өнімдерін егу жоспарлануда, — деді ауыл әкімі өз баяндамасында.
Жиын барысында аудан әкімі аппаратының ұйымдастыру бөлімінің бас инспекторы Асылхан Шалқаров округ аумағында атқарылған жұмыстардағы кемшіліктер бойынша баяндады. Қос ауылдың сыртқы қасбеті, ауылшаруашылығы саласында индикаторлардың орындалуы, тазалық, ирригация жүйесі мен жер қатынастары саласындағы өзекті мәселелер сөз болды. Аудан басшысы Жәнібек Есенұлы әрбір мәселе бойынша жауапты дербес бөлім басшылары мен Алпамыс батыр ауылдық округі әкімі аппаратында қызмет атқаратын мамандардың істеген жұмыстарына талдау жүргізді.
— Берілген тапсырманың орындалу деңгейі көңіл көншітпейді. Кәсіпкерлік саласында нақты 10 жобаны дайындап, өткізуді тапсырған болатынмын. Бүгінде бірде бір жоба ұсынылмаған. Ауылға тартылуы қажет болған инвестордың жұмысын үйлестіруде салғырттыққа жол берілген. Бұл жауапсыздық. Жұмысты тек ауыл әкімінен талап етеміз. Алайда онымен бірге қызмет атқаратын мамандар жауапсыз болса бәрі бекер. Мемлекеттік қызметшінің жауапкершілігі маңызды мәселе. Бұл тұрғыдан алсақ Алпамыс батыр ауылдық округі әкімі аппаратына реставрация жасау қажет деп ойлаймын. Мамандардың фунционалдық міндеттеріне талдау жасап, қажетті ұсынысты дайындаңыздар. Берілген тапсырмалардың орындалуы бойынша қатаң бақылауда ұстауды тапсырамын, — деді аудан әкімі.
