Ордабасы ауданы, Шұбар ауылдық округіне қарасты Аққойлы ауылында денсаулық сақтау саласын дамытудың 2020 – 2025 жылдарға арналған мемлекеттік бағдарламасы аясында жаңа фельдшерлік-акушерлік пункт пайдалануға берілді.
Жаңа нысанның ашылу рәсіміне аудан әкімі Азат Оралбаев, облыстық денсаулық сақтау басқармасы басшысының бірінші орынбасары Бауыржан Сатыбалды мен аудандық мәслихат төрағасы Бақдәулет Жұмабеков қатысып, ауыл тұрғындарын қуанышты сәтпен құттықтады.
– Құрметті Аққойлы ауылының тұрғындары! Жаңадан ашылған медициналық пункт құтты болсын! Жаңа ғимарат халықтың денсаулығын жақсартуға қызмет ете берсін. 2023 жылы ауданымызда денсаулық сақтау саласы бойынша бірқатар ауқымды жұмыстар атқарылды. Нәтижесінде, аудандағы ауылдар мен елді мекендерде 5 жаңа фельдшерлік-акушерлік пункт ашылып отыр. Бұл бағыттағы жұмыстар жалғасады,– деді аудан әкімі.
Аталған денсаулық сақтау мекемесінің құрылысын мердігер «ВИК» ЖШС 2019 жылы мемлекеттік жекеменшік әріптестік тетігі арқылы бастап, өткен жылы пайдалануға берілді. Енді ауылдағы 333 тұрғын осы орталықтан дәрігерге дейінгі және медициналық-санитариялық алғашқы көмек ала алады.
Өткен жылы ауданымыздың Төрткүл, Бөржар, Қараспан ауылдық округтерінде, Шұбару ауылдық округінің Сарытоғай, Жусансай ауылдарында 4 жаңа фельдшерлік-акушерлік пункт ғимараты ашылып, ел игілігіне берілді.
