Түркістанда ақпараттық технологиялар саласын дамыту мақсатында «Hack Turkistan» атты облыстық үздік жобалар байқауы өтті. Жобаның мақсаты — Түркістан облысының жастарына арнайы платформа ойлап табу. Сондай-ақ, «Egov.kz» порталынан жастардың өзіне қажетті анықтамаларды алуына жағдай жасау.
Мобильді қосымшаның ішінде мемлекеттік және жекелеген ұйымдар мен азаматтардың гранттары, стипендиялары, мамандықтар туралы ақпарат, ЖОО мен колледждер тізімі, бос жұмыс орындары мен мемлекеттік бағдарламалар, дағдыларды анықтайтын тестілеу секілді мүмкіндіктер бар. Ақпараттық бағдарлама жақын арада «App Store» мен «Play Market» жүйелерінен жүктеуге қол жетімді болады.
– Мобильді қосымша арқылы жастар өзіне қажетті барлық ақпаратты ала алады. Кез-келген жас өз ауданында өтіп жатқан іс-шаралар, үйірмелер, мерекелік кештер жайлы мәлімет алуына мүмкіндік бар, — деді облыстық Жастар ресурстық орталығының басшысы Ернар Бектаев.
Байқау нәтижесіне сәйкес, 1-орынды кентаулық Үмітжан Әріпжанов (500 000 теңге), 2-орынды түркістандық Мұхит Өсербай (300 000 теңге), 3-орынды «Turkistan» телеарнасының қызметкері Ғасыр Құралбайұлы (200 000 теңге) иеленді.
