Алты Алаштың мақтанышы, есімі елімізге кеңінен танымал тұлға, әңгіме жазудың хас шебері, қазақ әдебиетінің шоқ жұлдызы Бейімбет Майлиннің ізін жалғастырушы, Түлкібас ауданының төл перзенті Мархабат Байғұт ағамыздың шығармашылығын насихаттауға арналған « Мархабат оқулары» бүгінде аудан көлемінде орналасқан білім ошақтарында өз жалғасын табуда. Сондай тартымды әдеби іс-шара өткен аптада Мархабат ағамыздың өзі түлеп ұшып шыққан Абай атындағы мектеп-лицейде жалғасын тапты. Аталмыш білім ордасының мәжіліс залында өткен бұл іс-шараға мектеп ұжымынан бөлек «Мархабат-Мирас» қорының төрағасы, Түркістан облысының Құрметті азаматы, аудандық ардагерлер кеңесінің төрағасы Сәтбай Қасымбек, Түлкібас ауданының Құрметті азаматы, ұлағатты ұстаз, жазушы-журналист Мархабат Байғұттың сыныптасы Қалаубек Анашев қатысып отырды.
«Мархабат оқулары» мектеп көркемөнерпаздарының орындауындағы «Үркер» күйімен ашылды. «Тектіліктің туын биік ұстаған тұлға» атауымен ашылған әдеби іс-шарада «Мархабат-Мирас» қорының төрағасы Сәтбай Қасымбек, қаламгердің сыныптасы Қалаубек Анашев Мархабат ағаның жарқын бейнесін сағынышпен еске алып, жазушының шығармашылығына жан-жақты тоқталып өтті. Олар өз сөздеріне сөз зергерінің шеберлігін арқау етіп, оқушыларды жерлес жазушының кітаптарын жаппай оқуға шақырды. Ал, өз кезегінде қазақ тілі мен әдебиеті пәнінің мұғалімі Гүлнарай Сатымбекованың ұйымдастыруымен мектеп оқушылары М.Байғұттың әңгімелері аясында сахналық көріністер қойып, жазушы жақсы көретін «Ақтолғай» әнін нәшініне келтіре орындады. «Киік оты» шығармасынан монолог оқыды.
Бір сөзбен айтқанда, жазушы-журналист Мархабат Байғұттың шығармашылығы насихаттауға арналған «Мархабат оқулары» тартымды әрі қызықты өтіп, оған қатысқан қонақтар мен оқушыларға үлкен ой салды. Жазушының өнегелі өміріне, шығармашылығына деген қызығушылықтарын оятқаны анық. «Мархабат оқуларын» мектеп директоры Нұрғали Сағындықов қорытып, осы кездесуді өткізуге ат салысқан ұстаздар мен оқушыларға және алтын уақыттарын бөліп арнайы келген қонақтарға өзі басқарып отырған ұжымы атынан ризашылығын білдірді.
О.КӨМЕКОВ.
