Ұлы Дала – Қазақ елі, кең-байтақ Отанымыздың өркендеп көркеюіне өз үлесін қосып жүрген ауданымыздың шоқтығы биік «Дарын» мектебінің ұлағатты ұстазы –Жазира Елубайқызының ұстаздық жолындағы тағы да ерен еңбегін жариялауды жөн көрдік. Туған жерге, оның мәдениеті мен салт-дәстүріне айырықша іңкәрлікпен атсалысу – шынайы патриотизмнің маңызды көріністерінің бірі.
Құрманбаева Жазира туған елдің тарихына аса қызығушылық танытатын талантты оқушыларды анықтап, олардың шығармашылық қабілетін, қоғамдық белсенділігін дамытуға, өскелең ұрпақтың бойында қазақстандық патриотизм мен азаматтық сезімді қалыптастыруда, мектеп оқушыларының тарих және өлкетану бойынша білімін дамыту мақсатында ерекше жұмыстар атқарды. Ұлттың өзін-өзі тануына және олардың шағын Отанына деген мақтанышын арттыруды мақсат еткен жас тарихшылар «Менің шағын Отаным» атты VI республикалық интеллектуалдық конкурстың облыстық кезеңіне қатысқан Сапарбекқызы Ақерке мен Амалбек Асылай жүлделі І орынды иеленіп, республикаға жолдама алды.
«Менің шағын Отаным» атты VІ республикалық интеллектуалдық конкурсы 2023 жылдың 29 қазан – 1 қараша аралығында Ақтөбе қаласында өтті. Республика бойынша 88 оқушы қатысқан сайыста Түлкібас ауданының үш тілде оқытатын мамандандырылған мектеп-интернатының оқушылары Сапарбекқызы Ақерке жүлделі І орынды, Амалбек Асылай ІІ орынды иеленіп, өз білімдерін жоғары деңгейде көрсете алды. Ерекше дарын иелері Ақерке мен Асылай қыздарымыз, туған жерім – алтын бесігім деп туған елді көркейтуге аянбай тер төккен еліміздің адал перзенттерінің еңбегіне сүйсініп, келешекте өздері сол азаматтардың қатарында болғысы келетіндіктерін қорғаған жобаларынан танытты. Өскелең ұрпаққа еліне деген сүйіспеншілігін шыңдайтын дара жолды көрсете білген Жазира Елубайқызына алғысымыз шексіз! Еңбеке толағай табыс тілейміз.
Д.ОҢАЛБЕКОВ,
“Дарын” үш тілде білім беретін
мектеп интернатының тәрбие ісі жөніндегі орынбасары
