Бүгін Жетісай ауданының мәдениет, тілдерді дамыту, дене шынықтыру және спорт бөлімінің Тілдерді оқыту және дамыту орталығының ұйымдастыруымен «Қанекей, тілім, сөйлеші!» атты аудандық байқау өтті. Аталмыш шараға аудандық мәдениет, тілдерді дамыту, дене шынықтыру және спорт бөлімінің басшысы Еркебұлан Сейдалиев қатысып, қатысушыларға сәттілік тіледі.
Байқауға 16-29 жас аралығындағы арнаулы орта оқу орындары мен мектептерден 11 үміткер қатысып, үш кезең бойынша сынға түсті. Бірінші кезеңде қатысушылар өзін таныстырып сәлемдессе, екінші кезеңде жұмбақтап айтылған шешендік сөздердің, мақал-мәтелдердің астарын ашып, мән мағынасын түсіндіріп берді. Ақтық кезеңде ақын-жазушылардың шығармаларынан мәнерлеп жатқа оқу, күй, терме, дәстүрлі ән орындау сынды ұлттық өнер түрінен сайысқа түсті.
Қазылар алқасының шешімімен Ю.Гагарин атындағы №3 жалпы білім беретін мектеп мұғалімі Еркеназ Өмірзақ жеңімпаз атанды. Ә.Молдағұлова атындағы №34 жалпы білім беретін мектептен Аружан Семен II орынды, Ғ.Мұратбаев атындағы гуманитарлық-техникалық колледжінің қатысушысы Ілияс Манарбекұлы III орынды иеленді. Сонымен қатар «Үздік өнер көрсетуші» номинациясымен Н.Төреқұлов атындағы №13 жалпы білім беретін мектептің қатысушысы Лағыл Намаз, арнайы жүлде «Үздік киім үлгісі» номинациясымен №11 «Жеңіс» мектеп-гимназиясының қатысушы үміткері Айсұлу Ізтілеу марапатталды. Сондай-ақ барлық қатысушыға диплом мен бағалы сыйлықтар табысталды.
Айта кетейік, байқау мақсаты – Қазақстан Республикасында тіл саясатын іске асырудың 2020-2025 жылдарға арналған мемлекеттік бағдарламасын Жетісай ауданында жүзеге асыру, мемлекеттік тілдің қолдану аясын кеңейту, тіл мәдениетін көтеру, шешендік өнерді насихаттауды жандандыру, аудан жастарын сөз өнеріне жақын, тілге шешен, ділмар етіп тәрбиелеу.
