Сарыағаш ауданында мемлекет басшысының «Оқитын ұлт» жобасы аясында Түркістан облыстық мәдениет басқармасы және «Фараб» әмбебаб ғылыми кітапханасы мен Сарыағаш аудандық балалар кітапханасы бірлесе ұйымдастырған, ең көп оқитын оқырман балалар арасында «Әлемді кітап арқылы танимын» атты облыстық байқаудың қорытынды кезеңі өткізілді.
Байқауға 11-17 жас аралығындағы облыстық байқауға жолдама алған оқырмандар қатысып, үш кезең бойынша бақ сынасты. І кезеңде «Кітап әлемді бағындырады» зерттеу жұмысы немесе эссе жазу, ІІ «Оқы және бөліс» кезеңінде бейнекөрініс, анимация, көрініс көрсету және шешуші «Менің отбасым және кітапхана» кезеңінде қатысушылар кітапхана мен отбасын байланыстыра отырып, кітап оқу дәстүрін насихаттап бейнеролик көрсетті.
Қазылар алқасының шешімі бойынша үміткерлердің арасынан Созақ аудандық балалар кітапханасының оқырманы Кәусар Сахи үздік атанды. Ордабасы ауданынан Абдурахман Әбдіқари І орынды, Төлеби аудандық балалар кітапханасының оқырманы Жансұлтан Төребек пен Бәйдібек аудандық балалар кітапханасының оқырманы Жұлдыз Ұзақбай ІІ орынды, Отырар аудандық балалар кітапханасының оқырманы Баян Беделхан, Сайрам аудандық балалар кітапханасының оқырманы Сейітжан Назым және Түркістан қалалық кітапханасының оқырманы Әмина Бейбітхан жүлделі ІІІ орын иеленді. Сондай-ақ барлық қатысушы түрлі номинациялармен марапатталды.
Айта кетейік, облыстық Ы. Алтынсарин атындағы балалар кітапханасынан 2015 жылдан бастау алған «Әлемді кітап арқылы танимын» атты жобада биылғы жылы қазақ балалар жазушысы Бердібек Соқпақпаевтың «Балалық шаққа саяхат» атты шығармасы, Британдық жазушы Джоан Роулингтің «Гарри Поттер» қиял-ғажайып шығармасы және «Менің отбасым және кітапхана» тақырыбы таңдалды.
