Түлкібас ауданында «Түркістан таланттары» жобасы аясында өңірден түлеп ұшқан қаламгерлермен кездесу өтті. Қонақтар алдымен «Жаңа ғасыр жауһарлары» тақырыбында жасақталған кітап көрмесімен танысты.
Аталған шараның ашылу салтанатында Түлкібас ауданы әкімінің орынбасары Ербол Орманов, аудандық маслихат төрағасы Хамит Байысбаев, Түркістан облыстық «Фараб» әмбебап ғылыми кітапханасының директоры Жанат Шардарбекова сөз сөйлеп, қаламгерлерге шығармашылық табыс тіледі. Сондай-ақ, кеш кейіпкерлеріне Түлкібас ауданының әкімі Нұржан Ізтілеуовтың атынан алғыс хат табысталып, құрмет көрсетілді.
Шара барысында Түлкібас ауданының перзенті Мейірхан Топанбай, жас ақындар Ақбота Бейбітбек пен Арайлым Мұраталиева және Сезім Мергенбай сахна төрінде жиналған көрерменге өлең оқыды. Жыр кеші Қазақстан Жазушылар Одағының Түркістан облыстық филиалының төрағасы, ақын Айдар Сейдазым жүргізіп отырды.
