Түркістан облыстық Ыбырай Алтынсарин атындағы балалар кітапханасының ұйымдастыруымен халқымыздың дарынды тұлғаларының бірі – халқына деген сый-құрметін поэзиялық туындылары арқылы оқырмандарына жеткізіп жүрген ақын-жазушы, журналист, сатирик, композитор, заңгер, мемлекет және қоғам қайраткері, профессор, тұңғыш қазақ тілінде жазылған «Халықтың көші-қон туралы» Заңының авторы Әкім Ысқақтың балалар мен жасөспірімдерге арналған кезекті жыр жинақтары – «Күн ұлымын» және «Біздің Бапақ» кітабының тұсаукесер салтанаты өтті.
Тұсаукесер рәсіміне Қазақстан Жазушылар одағының Шымкент қалалық филиалының директоры, ақын Танабаев Дәркен Өміртайұлы, кітапхана ардагерлері Бегежанова Зоя Оралбайқызы, Дінәсілова Шәрбану Әлмаханбетқызы және Парымбекова Закира Сембекқызы, сондай-ақ аудандық балалар кітапханаларының қызметкерлері мен ақынның тілеулес оқырмандары қатысты. Кешті кітапхана қызметкері Наханова Талиға Тезекбайқызы жүргізді.
Кеш қонақтары үшін Шұбар ауылдық кітапханасының кітапханашысы Ешмұрат Әсем өзінің арнауын, оқушы оқырманды еріксіз езу тартқызып қана қоймай, жамандық атаулыдан бойын аулақ салып, әдептілікке тәрбиелейтін өлеңдерін жатқа айтып, ақынның сөзіне жазылған әндерін орындады. Іс-шара естелікке суретке түсумен түйінделді.
