Мемлекет басшысы Қасым-Жомарт Тоқаев Парламент палаталарының бірлескен отырысында ел халқына «Әділетті Қазақстанның экономикалық бағдары» атты Жолдауын арнады. Маңызды бастамалар көтерілген Жолдауда ел экономикасын көтерудің басты тетіктері сараланды. Сондай-ақ, алда тұрған сын-қатерлердің алдын алу жолдары пысықталды.
Иә, бүгін бүкіл әлем дағдарыс үстінде. Жаһандық жылыну, табиғи ресурстардың сарқылып келе жатқаны көп айтылып жүр. Солардың ішінде тіршілік нәрі – су көздерінің азаюы Қазақстан халқын ғана емес, басқа да елдерді қатты алаңдатып отыр. Президент атап көрсеткендей, біз трансшекаралық су көздеріне тәуелді елміз. Судың бас жағында отырған елдер бірде көл, бірде шөл болып тұрған кезеңде біз су тапшылығын жиі сезінудеміз. Сырдарияның өзінің кейде табаны көрініп қалады.
Міне, сондықтан Президент өз Жолдауында «Халқымыз «Судың да сұрауы бар» деп бекер айтпаған. Су дегеніміз – үнемдеп пайдаланбаса, тез таусылатын шектеулі ресурс. Онсыз шаруалардың күні қараң. Сол себепті бұл салада заңсыздыққа жол берілмейді. Талапқа бағынбағандар қатаң жазаға тартылады» деп атап көрсетті. Жасыратыны жоқ, біздің кейбір диқандар суды шексіз мөлшерде ысырап етіп жатады. Су ақабадан асып, бос жатқан жерге көл болып жайылады. Осы суды үнемдеп, басқа егінге жұмсаса, одан тек пайда болар еді. Біз мұны тиісті орындарға, егіншілер мен диқандарға үнемі ескертіп келеміз.
Суармалы жерлердің тиімділігін арттыру үшін жаңбырлатқыш құралдарды пайдалану маңызды. Оған әлі де қол жеткізе алмай жүрген диқандар бар. Олар каналдарды, арық-атыздарды ретімен қолданып, су ысырабына жол бермеу жағын қарастырғандары жөн. Жасыратыны жоқ, көптеген шаруа қожалығы төрағалары ерте көктемнен қара күзге дейін жалдамалы сушы ұстайды. Олар төраға жоқта көбіне жалқаулыққа жол береді, судың атызбен дұрыс ағуына қарамайды. Ендігі жерде бұған жол жоқ. «Суды нормативтен артық жұмсағандар оның ақысын жоғары тарифпен төлеуі керек» деді Президент. Енді осы талапқа бағыну керек.
Д.СЕЙІТОВ,
облыстық табиғи ресурстар және табиғатты
пайдалануды реттеу басқармасының бөлім басшысы.
