Бүгін Түркістанда ХХV «Қазақ романсиадасы» романс орындаушыларының байқауы басталды. Түркістан облыстық мәдениет және туризм басқармасы, «Южный Казахстан» қоғамдық-саяси газетінің ұйымдастыруымен өтіп жатқан өнер додасына Қазақстан, Өзбекстан, Тәжікстан елдерінен 64 үміткер қатысып жатыр. Олар байқау ережесіне сәйкес екі кезең бойынша бақ сынайды. Қазақ және орыс тілінде романс орындайды.
Сайысқа Ресейдің еңбек сіңірген әртісі, «Романсиада» халықаралық байқауы идеясының авторы және ұйымдастырушысы Галина Преображенская, Қазақстанның еңбек сіңірген қайраткері, «Астана Опера» Мемлекеттік опера және балет театры опера труппасының директоры, халықаралық сыйлықтардың лауреаты Азамат Желтыргузов, Қазақстанның еңбек сіңірген әртісі, Шымкент опера және балет театрының директоры Майра Мұхаммедқызы, «Романсиада» халықаралық байқауының жетекші концерттік орындаушысы Оксана Петриченко, С.Айни атындағы Тәжікстан мемлекеттік опера және балет театрының жетекші солисі Шарофат Усманова, Өзбекстанның халық әртісі, Науаи атындағы Мемлекеттік академиялық Үлкен театрдың жетекші солисі Аваз Раджабов, Қазақстанның еңбек сіңірген қайраткері, Абай атындағы Мемлекеттік академиялық опера және балет театрының солисі, Қазақтың кәсіптік өнері кафедрасының доценті Гүлзат Даурбаева, Абай атындағы Мемлекеттік академиялық опера және балет театрының солисі, гала-концерт қонағы Эмиль Сакавов, Халықаралық байқаулардың лауреаты, Жамбыл атындағы Қазақ мемлекеттік филармониясының әншісі, гала-концерт қонағы Береке Еңкебаева қазылық етіп жатыр.
Айта кетейік, 12 қараша күні сағат 18:00-де «Фараб» кітапханасының залында гала-концерті мен марапаттау рәсімі өтеді. Байқау жеңімпазы желтоқсан айында Ресей Федерациясының астанасы Мәскеу қаласында өтетін халықаралық романс орындаушыларының қорытынды байқауына қатысады.
