Жұпар Бейсенова – қолөнер шебері, Түркістан қаласындағы «Балалар қолөнер» мектебінде, ұстаз. Бүгінде киізден түрлі қолөнер еңбектерін жасап жүрген шебердің бұл кәсіпті қолға алғанына 10 жылдан аса уақыт болған. Нәпақасын тауып, отбасын да осы шаруаға баулиды. Себебі, тапсырыс жоғары. Қазақтың төл өнері қоғамға ауадай қажет дейді.
– Маған шеберлік өнері қанмен келді десем болады. Өйткені мен суретшілер отбасында тудым, әкем суретші болған, өз әжем де кезінде киіз басқан өте керемет шебер адам болған. Анам да тоқыма, кесте бұйымдарын жасаған. Соның барлығын әрі қарай дамытқым келіп, Шымкенттегі Ә.Қастеев атындағы көркем-сурет колледжін бітірдім. Әрі қарай Алматыдағы Т.Жүргенов атындағы Театр және көркем-сурет институтына түсіп, оны 1993 жылы бітірдім. Шебердің айтуынша қолөнерге қызығушылығы бала күнінде басталған. Ауылда киіз басқан кезінде үлкендер оюды жақсы салатынын байқап оның шеберлігін текеметті түрлендіруге пайдаланыпты. Өз мамандығы бойынша шебер 20 жылдан астам уақыт бойы жұмыс жасап келеді. Жоғарыда айтып өткендей, Түркістан қаласындағы «Балалар қолөнер» мектебінде ұстаздық қызмет атқарады. Қазір тоқыма бөлімінде ізін басып келе жатқан шәкірттері де бар.
Киіз басумен айналысып, киізден түрлі сәндік бұйымдарын ( кәдесый) , сондай-ақ шәркей, күнделікті киюге арналған аяқ-киімдер және көптеген ұлттық бұйымдар жасайды. Ал шәкірттерінің қолөнерге деген ынтасы жоғары және жылдан-жылға ұлттық өнерге қызығушылықтары артқанын айтып өтті. Айтуынша өз шәкірттері арасында республикалық, облыстық сайыстарға қатысып, жүлделі орындарға ие болып жүрген шебер оқушылар көп. Сонымен қатар, қолөнер шебері Жұпар Бейсенованың өзі де бірқатар жүлделерді қанжығасына байлаған. Қазақстан Суретшілер одағының, Еуразиялық дизайнерлер одағының мүшесі, «Он саусағынан өнер тамған шебер» және «Сапа белгісінің иегері» атанды.
«Бүгінде өзіміз тәрбиелеген шәкірттеріміз ұлттық қолөнердің түрлі салаларында қал-қадірінше еңбек етіп жүр. Ұлттық қолөнер дегеніміз халқымыздың ұлттық рухани жадының жаңғыруына, этномәдениетіміздің дамуына орасан зор үлес қосу деп білемін. Қазір этностиль заманауи атрибуттармен үйлесіп, жаңаша реңкке ие болып жатыр. Гүлденіп, жаңаша дамып, түрленіп келеді. Сонымен қатар ұлттық өнер өскелең ұрпақтың ұлттық жадындағы рухани сабақтастықтың жібін жалғайтын нәзік иірімдерге бай құбылыс деп айтуға болады», -дейді Жұпар Бейсенова.
Ж.ШЫРЫНБЕКОВА.
