Бүгін «Түркістан таланттары» жобасы аясында Халықаралық «Алаш» әдеби сыйлығының лауреаты, Ресейдің Халықаралық Психология академиясының Құрметті мүшесі, Қазақстанның құрметті журналисі, Мәдениет саласының үздігі, Созақ, Мақтаарал және Бәйдібек аудандарының құрметті азаматы Сабырбек Олжабаймен «Қажымас қаламгер» атты кездесу кеші өтті. Облыстық «Фараб» кітапханасында кешке филология ғылымдарының докторы, профессор, «Түркі әлемінің үздік педагогы», «Қазақстанның құрметті азаматы» Сейдулла Садықов, Қоғамдық ғылымдар академиясының академигі Тағабек Әліпбаев, Созақ ауданы Құмкент ауылдық округінің әкімі Ерзат Балықбаев және тағы да басқа зиялы қауым өкілдері қатысты. Шарада Қазақстан Жазушылар одағы Түркістан облыстық филиалының төрағасы Айдар Сейдазым модераторлық етіп, кеш тізгінін ұстады.
Кездесуде «Балалар мен жасаөспірімдер» орталығының кітап сүйер оқырмандары Сабырбек Олжабайдың туындыларынан үзінділер оқып, 17 ауданның кітапханашылары «ZOOM» платформасы арқылы тікелей эфирге қосылды. Шара барысында жазушының өмір жолынан бейнеролик көрсетіліп, кітап көрмесі таныстырылды.
Шара соңында шығармашылық кешті жоғары дәрежеде ұйымдастырғаны үшін Түркістан облыстық «Фараб» әмбебап ғылыми кітапханасының директоры Жанат Шардарбекова, Бұқаралық көрмелік іс-шаралар секторының меңгерушісі Пернекул Нәлтаева және Оқу залының сектор меңгерушісі Перизат Таңатқызы «Оңтүстік Қазақстан» қоғамдық-саяси газетінің Бас редакторы Абай Балажанның Құрмет грамотасымен марапатталды.
