Отырар ауданында Қазақстанның халық ағарту ісінің озық қызметкері, Отырар ауданының құрметті азаматы, спорт ардагері Оңалбек Өтебайұлының жүлдесіне арналған Қазақ күресінен 2009-2010 жылдары туылған кіші жасөспірімдер арасындағы республикалық турнирдің ашылу салтанаты өтті.
Шараға аудан әкімінің орынбасары Айдос Құлмаханов арнайы қатысып, білекті де жүректі балуандарға сәттілік тіледі.
Ол өз сөзінде: «Ауданымызда бұқаралық спортты дамыту, жастар арасында салауатты өмір салтын насихаттау бағытындағы спорттық шаралар назардан тыс қалған емес. Бүгінде аудан көлемінде спорттық сауықтыру кешендерінен бөлек аудан азаматтарының қолдауымен көптеген спорттық нысандар ашылып, жастардың дене шынықтырумен айналысып, спортпен шұғылдануына қолайлы жағдай жасалуда. Бүгін біз спорт ардагері Оңалбек Өтебайұлының бастамасымен Қоғам ауылындағы күрес залының ашылуына куә болдық. Енді міне аталған шара соңы республикалық турнирге ұласып отыр. Ендеше бүгінгі жарысқа қатысушы балуандарға сәттілік тілеймін!» — деді.
Оңалбек Әуелбеков — Отырар ауданында қазақ күресінің дамуына сүбелі үлес қосқан білікті бапкер. Оның спортқа баулыған шәкірттері ауданның ішкі чемпионатында 18 рет командалық есепте жеңіске жеткен. Сондай-ақ, облыстық турнирге Отырар ауданының балуандарын баптап қосқанда 16 жыл қатарынан олардың алдын ешкім орай алған жоқ. Тіпті республикалық деңгейдегі турнирлерде 4 мәрте жеңіске жетіп, қазақ күресі, самбо, дзюдо сынды спорт түрлерінен 15-ке жуық спорт шеберін шығарды. Азияның чемпионы, әлем чемпионатының жүлдегері де осы Оңалбек Өтебайұлы бапкерлік еткен күрес залынан қанаттанып шыққан. Бүгінгі республикалық турнирдің жоғары деңгейде өтуі осы жеңісті күндердің жемісі десек қателеспеген болар едік.
Айта кету керек спорттық бәсекеге еліміздің Қызылорда облысы мен Шымкент қаласы және Түркістан облысының 11 ауданынан келген, жалпы саны 220 балуан қатысып, бақтарын сынауда.
Боз кілемде кіл мықтының арасынан өздерінің мықты екендерін дәлелдеуге асыққан балуандар жарыс жеңімпазы болуға барын салып жатты. Турнир соңында жеңімпаздар анықталып, жүлдегерлер арнайы медальдармен марапатталып, бағалы сыйлықтарға ие болды.
