Ұлылардың Отаны саналған киелі Отырар топырағында белгілі спортшылардан бөлек ақын жазушылар мен мемлекет және қоғам қайраткерлері шыққан. Сондай тау тұлғалы азаматтың бірі Ұлы Отан соғысының ардагері, «Қызыл жұлдыз», «Даңқ» ордендерінің иегері, кезінде ауданымыздың спорт саласын басқарған білікті басшы Белгібаев Имансары Айтбайұлы. Осындай нар тұлғалы ел азаматтарының есімін ұлықтап, дәріптеу бізге парыз.
Осы мақсатта Отырар ауданында еңбек ері Имансары Айтбайұлын еске алуға арналған кіші футболдан жастар арасында турнир өтті. Турнирдің ашылу салтанатына аудан әкімінің орынбасары Айдос Құлмаханов арнайы қатысып, жарысқа қатысушы командаларға сәттілік тіледі.
Ол өз сөзінде: «Имансары Айтбайұлы кезінде ауданымыздың спорт саласын басқарып, соғыс біткеннен кейін де бірнеше қызметте болып, еліміздің дамуы жолында аянбай еңбек ете білді. Бүгінгі спорттық шара да осындай асыл азаматты еске алу мақсатында ұйымдастырылып отыр. Киелі өңіріміздің өсіп-өркендеуі мен әлеуметтік-экономикалық дамуына сүбелі үлес қосқан ел азаматының өнегелі өмір жолдарын кейінгі жастарға үлгі ете отырып, жастарды патриоттыққа, елге адал қызмет етуге тәрбиелеудің маңызы зор деп санаймын», — деді.
Шара барысында еңбек ерінің ұл-қыздары мен туыстары сөз алып, турнирді ұйымдастыруға қолдау білдірген аудан әкімдігіне, спорт саласының мамандарына шынайы алғысын жеткізді.
Одан әрі командалар жасыл алаңда тартысты ойын өрнегін көрсетіп, жеңімпаз атануға талпыныстары жоғары екендігін дәлелдеді. Сайыс қорытындысы бойынша жеңімпаздар арнайы алғыс хаттармен, медальдармен марапатталып, жүлдегерлерге қаржылай сыйлықтар табысталды.
