Республика күніне орай Ордабасы ауданындағы тарихи орын — Қарауыл төбеде мемлекеттік рәмізіміз — көк Ту көтеріліп, әнұран орындалды.
Салтанатты шараға аудан әкімі Азат Оралбаев, аудандық мәслихат төрағасы Бақдәулет Жұмабеков, зиялы қауым өкілдері мен ардагерлер, мәслихат депутаттары, әскери қызметшілер мен әкімдіктегі дербес бөлім басшылары және аудан тұрғындары қатысты.
Мерейлі мерекеге орай аудан әкімі Азат Әбдіғалиұлы жиналған қауымды Республика күнімен құттықтап, мемлекеттік рәміздерге деген құрметті өскелең ұрпақ санасына ұялатудағы аға буынның еңбегіне ризашылығын жеткізді.
Ел тарихында тәуелсіз мемлекет болып қалудың тағдыршешті сәті ретінде осыдан 33 жыл бұрын 25 қазан күні “Егемендік туралы” декларация қабылданғанын еске алған ауданымыздың зиялы қауым өкілдері ұлт үшін ұлық мерекенің мән-маңызына тоқталып өтті.
Темірланда тәуелсіз еліміз үшін айтулы мереке – Республика күні тойланды.
Ордабасы аудандық Мәдениет үйінде ұйымдастырылған салтанатты шарада аудан әкімі Азат Оралбаев тұрғындарды Республика күні мерекесімен құттықтап, ізгі тілегін жеткізді.
«Өздеріңізге белгілі, халқымыз үшін мәні ерекше мейрам биыл екінші жыл тойланып отыр. Тәуелсіздік жылдары еліміз экономикалық тұрғыда дамып, халқымыздың әл-ауқаты артты. Бұл ретте ауданымызда да өсім-көрсеткіш жақсы. Күні кеше осы айтулы мерекеге орай бірқатар ауылда әлеуметтік нысандар, инженерлік-инфрақұрылым құрылыс нысандары ашылып, ел игілігіне берілді. Мұның барлығы Республикамыздағы тұрақтылық пен қарқынды дамудың жемісі деуге толық негіз бар. Біз аудан тұрғындарымен береке-бірлікте алда талай ауқымды істерді, жасампаз жобаларды атқаратын боламыз», деді аудан әкімі мерекелік құттықтауында.
Салтанатты шара барысында ауданның әлеуметтік-экономикалық дамуына қосқан үлесі мен қоғамдық жұмыстарға белсене ат салысқаны үшін бірқатар азаматтар министрлік Грамотасы, аудан әкімінің Алғыс хатымен марапатталды.
Мерекелік жиын концертке ұласып, аудандық Мәдениет үйінің өнерпаздары көрермендерге атаулы күнге арналған қойылымдар ұсынды.
Естеріңізге салар болсақ, осыдан 33 жыл бұрын 25 қазан күні Қазақ КСР Жоғарғы Кеңесінің шешімімен мемлекеттің егемендігі туралы декларация қабылданған болатын. Сол сәттен бастап егеменді Қазақстан өзіндік көзқарасы бар жеке мемлекет ретінде танылып, егемендігін мәлім ететін жеке территориясы, азаматтығы, мемлекеттік бюджеті, халықаралық қатынастардағы дербестігі, рәміздері бекітілді.
Республика күнін мемлекеттік мерекелер қатарына қосуды Мемлекет басшысы Қасым-Жомарт Кемелұлы Тоқаев Ұлттық құрылтайдың I отырысында мәлімдеген болатын.
Сонымен бірге, Ордабасы ауданының әкімі Азат Оралбаев аудан тұрғындарына мерекеге орай құттықтауын жолдады.
«Құрметті жерлестер! Сіздерді Республика күнімен шын жүректен құттықтаймын!
Бұл күн Мемлекет басшысы Қасым-Жомарт Кемелұлы Тоқаевтың бастамасымен еліміздің ұлттық мерекесі қатарына қайта қосылды. Көпшілік білетіндей, 1990 жылғы 25 қазанда «Егемендік туралы» декларация қабылданды, еліміз тәуелсіздікке бет бұрды, азат болудың алғышарты жасалды. Сондықтан біз үшін бұл күннің орны ерекше.
Тәуелсіздік тарихына үңілер болсақ, осы жылдар аралығында экономикамыз нығайып, халықтың тұрмыс-тіршілігі жақсара түсті. Еліміздің тұрақты дамуына жерлестеріміздің де үлесі зор.
Ауданымызда ауыл шаруашылығы саласы дамып, өндіріске, оның ішінде шағын және орта бизнес қарқынды дамды.
Күні кеше, осы айтулы мерекеге орай ауыл, елді мекендерде жаңа әлеуметтік нысандар ел игілігіне берілді.
Ауданымызды табиғи газбен қамту, білім беру, медицциналық мекемелер құрылысын жүргізуде де ауыз толтырып айтатын жаңалығымыз көп.
Міне, осы еңбектің барлығында еңбекқор, бірлігі мен тірлігі жарасқан аудан тұрғындарының үлесі зор.
Қазіргі шақта Жаңа, Әділетті Қазақстанды құрудың маңызды қадамдары жасалуда. Еліміздің құрылымдық жүйесінде, саяси-экономикалық бағытында жаңғыртулар қолға алынды. Халық жаңа қоғам қалыптастыруға деген бастамаларға қолдау білдірді. Демократиялық үрдістерді орнықтыруға, тұрғындардың өмір сүру сапасын жақсартуға бағытталған бұл өзгерістердің жетісулықтар үшін де маңызы зор болмақ.
Мемлекет басшысының «Біз үшін Қазақстанның Тәуелсіздігі бәрінен қымбат. Осы тұрақсыз, құбылмалы әлемде Қазақстанымыз бізден басқа ешкімге керек емес. Сондықтан, маған елімнің амандығы мен жерімнің тұтастығынан асқан ешбір құндылық жоқ», — деген сөзі әрқайсымыздың жадымызда жатталып тұр.
Құрметті қауым! Республика күні мерекесі құтты болсын! Әр шаңыраққа бақ дарып, ырыс ұяласын! Елімізге тыныштық, халқымызға береке-бірлік, еңбектеріңізге табыс, игілікті ғұмыр тілеймін», делінген құттықтауда.
