2023 жылғы 5-қарашада өтетін пилоттық режимде өтетін аудандар мен қалалар әкімдерінің сайлауына дайындық және оны ұйымдастыру барысымен танысу үшін Қазақстан Республикасы Орталық сайлау комиссиясының төрағасы Нұрлан Әбдіров жұмыс сапарымен Бәйдібек ауданында болды.
Іссапарға ҚР ОСК хатшысы Мұхтар Ерман және Орталық сайлау комиссиясы аппаратының жауапты қызметкерлері қатысты.
Орталық сайлау комиссиясының басшылығы ауданымыздағы №174, №188, №190 учаскелік сайлау комиссияларының жұмысымен танысты. Аудандық сайлау комиссиясының мүшелері және аудандағы барлық учаскелік сайлау комиссияларының төрағаларының қатысуымен «Дауыс беру күні» тренингі көрсетілді.
Жұмыс сапары барысында ҚР ОСК төрағасы Нұрлан Мәжитұлы – Жамбыл ауылының тұрғындарымен және олар сайлаған әкіммен кездесті. Кездесуде сайлау жүйесіндегі маңызды конституциялық реформалар, аудан әкімінің алдағы сайлауы, ауыл әкімдерін сайлаудың жинақталған тәжірибесі және олардың қызметін бағалау туралы егжей-тегжейлі айтып берді. Жамбыл ауылының тұрғындары Әмір Айдарұлы, Марина Маликова, Жеңіс Дүмшебаевтар ауыл әкімін сайлау тәжірибесімен бөліссе, еңбек ардагері Сейділда Тұрлыбеков әкімдерді тікелей сайлау мем-лекеттік қызметте тиімді басқарушыларды іріктеу және ілгерілету үшін әлеуметтік лифтке айналғанын айтты.
«Жастар орталығының» мәжіліс залында ауданның жастарымен кездесіп, дауыс берудің баламалы нысандарын қолданудың халықаралық тәжірибесін, пропорционалды жүйемен қатар мажоритарлық жүйені қолдану, сондай-ақ аудандық деңгейдегі әкімдердің сайлауын алғаш рет өткізетінін егжей-тегжейлі баяндады.
Кездесуде Әсілхан Жаннель сайлаушының дауыс беру құқығы туралы сөз қозғаса, Закария Ізмахан сайлауды байқау үшін қоғамдық бірлестіктер мен коммерциялық емес ұйымдарды аккредиттеу институтын енгізуді қолдап, байқаушылардың кәсіби деңгейін көтеру құралы ретінде оның мерзімдерін нақтылады.
Іссапар соңында Нұрлан Мәжитұлы Бәйдібек ауданы әкімінің сайлауын пилоттық режимде өткізу мәселелері бойынша кең көлемде ашық кеңес өткізді. Жиын барысында атқарылып жатқан жұмыстар мен сайлауға дайындық туралы Бәйдібек ауданы әкімінің міндетін атқарушы Берік Тұрлыбеков, Бәйдібек ауданының прокуроры Мәди Байтелиев, аудандық полиция бөлімі бастығының орынбасары Сержан Сағымбаев, аудандық жұмыспен қамту және әлеуметтік бағдарламалар бөлімі басшысының міндетін атқарушы Ержан Отыншиев, Бәйдібек аудандық аумақтық сайлау комиссиясының төрағасы Марат Қырықбаев баяндады.
Орталық сайлау комиссиясының төрағасы кеңеске қатысқан лауазымды тұлғалардың назарын сайлауды заңнамаға сәйкес өткізу және қоғамдық және өзге де қауіпсіздікті қамтамасыз ету қажеттігіне аударып, сайлауға дайындықты қорытындылады.
