Мемлекет басшысы Қ.Тоқаев «Әділетті мемлекет. Біртұтас ұлт. Берекелі қоғам» атты Жолдауында «Жергілікті өзін-өзі басқару мәселелеріне, қоғамдық кеңестердің, пәтер иелері кооперативтері мен мүлік иелері бірлестіктерінің қызметін өзгертуге айрықша назар аудару қажет. Тұрғын-үйлер мен қала инфрақұрылымын абаттандыру мәселесін қолға алу керек, деп айтып өткен болатын.
Түркістан облысының әкімі Дархан Сатыбалды Келес ауданының тұрғындарымен кездесуінде өңірдегі ауыз мәселесі көтерілген еді. Облыс әкімі түйіткілді мәселені шешу бағытында кешенді шаралар атқарылатынын айтып, өз бақылауына алған болатын.
Тұрғындар айтқан мәселені шешу үшін облыс басшысы Келес ауданына Түркістан облысының энергетика және тұрғын үй-коммуналдық шаруашылық басқармасының басшысы Мұздыбеков Руслан Орынтайұлы бастаған жұмысшы топты арнайы жіберіп, ауыз су жүйесінде орын алып жатқан олқылықтарды жою бағытында атқарылатын жұмыстар талқыланды.
Басқарма басшысы бастаған топты Келес ауданының әкімі Жәнібек Ағыбаев қарсы алып, алдымен Жолбасшы, Көлтоған және Игілік ауылдарындағы ауыз мәселесімен таныстырды. Түйіткілді түбегейлі шешу шаралары пысықталды.
— Келес ауданында осыған дейін бірнеше ауылдарда ауыз құрылысы жүрді. Сол нысандардағы басты мәселе жер асты су қорының мөлшері. Ауылдардың басым бөлігінде берілген жер асты суы қорының сараптамасы талапқа сай емес. Нәтижесінде бастапқы жоспар өзгеріп, тұрғындарды тұрақты ауыз сумен қамтуда кедергілерге тап болудамыз, — деген Жәнібек Есенұлы жұмысшы топтың ұсыныстарын тыңдады.
Өз кезегінде басқарма басшысы бастаған топ өкілдері толыққанды зерделеу жұмыстарын жүргізе келе, нақты ұсыныстарды жеткізетінін атап өтті. Талқылауға ауыл билері мен сала мамандары да қатысып, өз пікірлерін білдірді. Жұмысшы топ Біртілек, Бірлік, Ұшқын және Алпамыс батыр ауылдық округтеріндегі ауыз су нысандарында болып, ондағы жағдайды сарапқа салды.
