Білімді, тәрбиелі және дені сау ұрпақ – ұлттың ең қымбат байлығы! Балалар мен жасөспірімдердің білім алуымен қатар, спортпен шұғылданып, жан-жақты жетілуіне қолайлы жағдай жасау — ел басшыларының алға қойған міндеттерінің бірі болса керек.
– Ұлт денсаулығын бекемдеу мәселесі де өте өзекті. Барлық жас санаты арасында бұқаралық спорт түрлерін насихаттай беру керек. Балалар үшін спорттық инфрақұрылымның барынша қолжетімді болуын қамтамасыз ету керек. Бұқаралық спортты дамыту – пирамидаға айналуы қажет. Оның басына чемпиондар шықса, оның негізінде біз сау әрі саналы ұрпақты, мықты ұлтты қалыптастырамыз, – деген Қазақстан Республикасының Президенті Қасым-Жомарт Кемелұлы бұқаралық спортты дамытуға арналған кешенді бағдарлама қабылдау керектігін айтқан болатын.
Президенттің осы тапсырмасын жүзеге асыру мақсатында – «Дене шынықтыру мен бұқаралық спортты дамыту жөніндегі 2020-2025 жылдарға арналған кешенді жоспар» әзірленіп, Үкімет қаулысымен бекітілгені мәлім. Осы жоспарға сәйкес, мемлекет-жекеменшік әріптестігі аясында спорт секцияларын ашу, олардың жұмыстарын жандандыру және спорт кешендерін көптеп салуды да қолға ала бастады.
Соның бір парасы – Бәйдібек ауданында да жүзеге асып келеді. Атап айтар болсақ, Алмалы ауылдық округіне қарасты, Бәйдібек ата ауылынан дене шынықтыру-сауықтыру кешені бой көтеріп, бүгінде нысанның құрылысы аяқталуға жақын қалды. Бәйдібек аудандық құрылыс, сәулет және қала құрылысы бөлімінің тапсырысы бойынша бой көтерген спорт кешенінің құрылысын «Молшылық-1» жауапкершілігі шектеулі серіктестігі жүргізіп отыр.
— Спорт кешенінің жұмысын таяу күндері бітіруге жақындап қалдық. Құрылыстың негізі қаланғанынан бастап тиісті мекемелер қадағалап келеді. Ел игілігіне сапалы спорт кешенін өткізуді жоспарлап отырмыз. Құны 323 млн. теңгені құрайтын нысанның қазіргі таңда сыртқы жұмыстары ғана қалды. Нақтырақ айтар болсақ, кешен ауласындағы аяқ жолдарға брушатка мен асфальт төсеу және көркейту-көгалдандыру жұмыстары қалып отыр. Жылыту маусымына дейін кешен ішіндегі жылыту жүйелерін іске қосып, алдын ала тексеріп аламыз. Сондай-ақ, спорттық жаттығуларға қажетті құрал-жабдықтарды орнатып болған соң, пайдалануға береміз деп отырмыз, — дейді учаске бастығы Ерман Усербаев.
Балалардың қазіргі кезде тек жекпе-жек түрлеріне ғана емес, өзге де спорт түрлеріне қызығатыны рас. Оның үстіне ата-аналар балаларының спортпен айналысуы денсаулығына, тәрбиесіне пайдасы көп екенін жақсы түсінеді. Сонымен қатар, балалар бос уақытын текке өткізбей, спортпен шұғылданып, түрлі жарыстарға қатысып, жүлделі орындардан көрініп жатса ата-ана мен ұстаздар үшін үлкен мәртебе екені және анық. Жалпы спорт – балалардың жаман әдеттерден бойын аулақ ұстауға, ерік-жігері мен табандылығын шыңдауға, келешекте қиындыққа төзімді, шыныққан азамат болып өсуіне көп септігін тигізеді.
Бәйдібек ата ауылынан кезінде көптеген спортшылар шыққан. Ел намысын қорғап, абыройын асқақтатып жүргендері қаншама! Ауылдан осындай зәулім спорт кешені ел игілігіне беріліп жатса, өскелең ұрпақ үшін үлкен дүние болайын деп тұр. Барлық жағдай жасалған спорт кешенінде жастар дайындалып, түрлі спорттық үйірмелерге қатысып, әлі-ақ елдің атын шығарары сөзсіз.
Алыстан көзтартарлық зәулім спорт кешені құрылысының сапалы атқарылуына көңіліміз толғандай. Құрылыс жұмыстарына жергілікті жерден жұмысшылар тартылып, ел азаматтары да атсалысуда. Ауыл ақсақалдары құрылыс жұмыстарымен күнделікті танысып, нысанның сапалы бой көтеруін қадағалауда. Мердігер мекеме тамыз айының соңына дейін нысанды өткізуді жоспарлап отыр.
Е.АБЗАЛҰЛЫ.
