Осы жылдың маусым айында Түркістан қаласында өткен Ұлттық құрылтайдың ll отырысында Мемлекет басшысы: «Жастарымыз сөзге құмар, жағымпаз, жалқау, енжар, масыл болмауы тиіс. Оларды осындай теріс әрекеттерден қашық болуға үйрету міндетіміз. Біз, аға буын өкілдері,еңбекқорлық,іскерлік сияқты құндылықтарды өзіміз үлгі көрсету арқылы дәріптеуіміз керек. Елімізде отаншыл, жасампаз, батыл, дарынды, білімді, озық әрі еңбекқор жандар өте көп. Мен осындай азаматтарды көргенде болашағымыздың жарқын боларына зор сеніммен қараймын»,- деп айтқан болатын.
Мен өзім Президентіміз айтқандай, нағыз еңбек азаматтарының бірі — Амантай Керімбеков атамыз екендігіне кәміл сенемін.
1948 жылдың 24 қаңтарында туылып, еңбек жолын 1966 жылы Түркістан қаласындағы темір жол стансасына қарасты локомотив депосының қатардағы токарлығынан бастаған Әбекең 1967-1969 жылдары әскери борышын өтеп келгеннен кейін Түркістан қаласындағы темір жол локомотив депосының машинист көмекшісі, машинист,шебер,аға шебер,аға инженер қызметтерін атқара жүріп,Ташкент қаласындағы темір жол транспорты институтын инженер-механик мамандығы бойынша бітірді.
Сонан соң Амантай ата Шиелі темір жол локомотив депосында бастығының орынбасары, Түркістан қаласындағы темір жол локомотив депосында бастығының орынбасары,Арыс қаласындағы темір жол локомотив депосының бас инженері,,Шымкент қаласындағы темір жол локомотив депосының бастығы,сол депода кәсіподақ комитетінің төрағасы, депо шаруашылығының ревизоры,Түркістан қаласындағы темір жол локомотив депосының бастығы қызметтерін абыроймен атқарып, 2011 жылы зейнеткерлікке шықты.
Қандай қызметте болмасын Амантай атамыз жастарға тәлім-тәрбие беруден,оларды еңбекқорлыққа үйретуден жалыққан емес.Қазір кезде оның шәкірттері еліміздің барлық жерінде темір жол саласында табысты еңбек етіп жүр.
Атамыздың ерен еңбектері елеусіз қалған емес.Бірнеше мемлекеттік наградалардың , «Қазақстан Республикасына еңбегі сіңген теміржолшы», «Түркістан қаласының құрметті азаматы» төсбелглерінің иегері.
Амантай Керімбеков атамызды және барлық еңбек адамдарын бүгінгі мерекемен, яғни Қазақстан Республикасындағы «Еңбек күнімен» шын жүректен құттықтаймын.
Өздеріне және отбасыларына зор денсаулық, қажымас қайрат,бірлік пен ынтымақ,құт пен ырыс,береке мен сыйластық тілеймін.
Бақытжан Бейсембаев, Түркістан облыстық Қоғамдық кеңес мүшесі, облыстық ҚХА жанындағы медиация кеңесінің төрағасы
