1 қазан — Халықаралық қарттар күні мерекесі қарсаңында Түркістан қалалық орталық кітапхана ұжымының бастамасымен және осы кітапхананың кітапханашысы Марияш Мамированың модераторлық етуімен аталған орталық кітапхананың жанынан ашылып, жұмыс істеп жатқан «Замандас» клубының мүшелері — ақ жаулықты апа. — әжелеріміздің және мектеп оқушыларының қатысуында «Көп жасаған қария — ақылы теңіз дария» тақырыбында өнегелі тәлім — тәрбие бағытындағы іс-шара өткізілді.
Бұл іс-шараның мақсаты — өскелең ұрпақтың бойына халқымыздың асыл қасиеттерін сіңіру, үлкенді сыйлауды, өз ата — бабасын құрметтеп қастерлеуді, оларды ұмытпай есте сақтауды үйрету, жастардың өзіміздің салт — дəстүрімізден нəр алып өсуіне, оларды инабаттылық пен ізгілікке, имандылық пен сыйластыққа, жақсы мен жаманды ажырата білуге, аталы сөзден ғибрат алуға тәрбиелеу.
Осы жиынға қатысып отырған «Замандас» клубының төрайымы Рыс Ташметова мен клубтың белсенді мүшелері Ханымгүл Ахметова, РаушанТойлақова, Айткүл Ташметова, Аманкүл Ташметова , Жұмакүл Өтебаева, Айзада Əшімова, Патима Искакова өз сөздерінде бала тәрбиесіне ата-ана тарапынан, бала-бақша мен мектеп қабырғасынан бастап өте көп көңіл бөліну қажеттігін атап көрсете келіп,адамның өмірінің мəні мен сұлулығы, адамның келешегіне сенімділігі — баланың өзінің туған ата — анасын ардақ тұтып өзінің перзенттік қарызы мен парызын бір сəтке де есінен шығармаулары керек екендігі жайлы айтқан соң, әжелеріміз қаладағы Сәкен Сейфуллин атындағы жалпы орта мектеп оқушыларының тарапынан қойылған сұрақтарға тиісті жауаптарын берді.
Ic- шара барысында қалалық орталық кітапхананың басшылығы атынан «Қарттар күні» мерекесіне орай «Замандас» клубының мүшелері — ақ жаулықты апа-әжелерімізге алғыс хаттар тапсырылса, апа-әжелеріміздің құрметіне Түркістан облыстық «Қазақ тілі» қоғамдық бірлестігінің төрағасы Талғат Шағырбаев өз тартқан домбыраның сүйемелдеуімен қазақтың бірнеше әнін тамылжыта орындап беріп,көрерменді қуантты.
Жиын соңында қатысушылар «Қарттар — біздің асыл қазынамыз» атты тақырыпта ұйымдастырылған кітап көрмесімен танысты.
Бақытжан БЕЙСЕМБАЕВ, Түркістан облыстық Қоғамдық кеңес мүшесі,облыстық ҚХА жанындағы медиация кеңесінің төрағасы
