Біз, қашан да үлкенге құрмет, кішіге ізет көрсетіп өскен дана халықтың ұрпағымыз. Сол себепті де, қарттар – біздің асыл қазынамыз. Ортада жүрген қарияларымыздың бір кезде елі, халқы, келешек ұрпағы үшін жасаған игі істері ерекше құрметке лайық. «Жас кезімде бейнет бер, қартайғанда зейнет бер» дегендейін, кезінде ауданымыздың өсіп-өркендеуі жолында талмай еңбек етіп, небір сын сағатта халқына сүйеу, жұртына қамқор бола білген қазыналы қария — Райымбеков Сүлеймен атамыз.
Осы ретте, қарияларға құрмет көрсету, әрбір жастың азаматтық борышы деп ұғынған Қазығұрт ауданында орналасқан «№11 Колледж» студенттерінен құралған Жанашырлар» еріктілер клубының ерікті жастары Райымбеков Сүлеймен атамыздың үйіне барып, үй шаруасының жұмыстарына көмектесіп, ауласының шөбін өріп, тазалық жұмыстарын жүргізді.
Қай кезеңде болсын біз, қарттарға үлкен мән беріп, көңіл аударып, жан-жақты қамқорлық жасауды жөн көретін елміз.. Себебі, Қазақстанның өсіп-өркендеуіне, еліміздің бейбітшілік тыныш өмір кешуіне өз үлестерін қосқан осы ардақты да аяулы қарттарымыздың арқасы. Олардың өмір жолдары бүгінгі ұрпаққа табылмас қазына.
Райымбеков Сүлеймен атамыз құрметтеп келіп, қолдан келген көмегін аямаған ерікті жастарымызға шынайы ризашылығын білдіріп, еліміздің мәртебесі биіктеп, ел-жұртымыздың аман болуын тілеп, батасын берді.
Осы бағыттағы игі шаралар алдағы уақыттарда барлық ауыл округтерінде өз жалғасын табатын болады.
