Мемлекеттік қолдаулар халықтың табысын арттыру мақсатында жүзеге асырылуда.
Орта және шағын бизнесті дамыту – өңірдегі жұмыссыздықты жоюда, нарықты халыққа қажетті тауарлармен толтыруда, өңірлердің экономикасын тұрақтандыруда шешуші фактор. Сондықтан да еліміздегі шағын және орта бизнесті дамыту мәселесіне жан-жақты жағдай жасалып, Түркістан облысының әкімі Дархан Амангелдіұлы тарапынан да айрықша назар аударылып отыр. Осы тұрғыда қабылданған мемлекеттік бағдарламалар мен жан-жақты қолдаулар жеке кәсіппен шұғылданамын, кәсібімді кеңейтемін деушілерге мол мүмкіндіктерді қарастырған.
Келес ауданының тұрғыны Нұржамал Асқарқызы сүйікті ісін кәсіпке айналдырғанына бір ай болды. Аз уақытта оның тағамдарына сұраныс қалыптасты.
Ол жастайынан түрлі тәттілер пісіруге әуес болған. Келін болып түскеніне 6 жыл толған жеке кәсіпкер маусым айында мемлекеттен қайтарымсыз қаржы алған. Алған қаржысына кондитерлік өнімдерді өндіруге арналған қажетті саймандарын сатып алып, кәсібін дөңгелетіп отыр.
– Бұл бастамам өміріме үлкен өзгеріс алып келді. Өзім қызығатын хоббиымды дамытып, өркендетіп жатырмын. Пісірген өнімдерімді ауылдағы дүкендерге сатамын. Одан бөлек тапсырыс бойынша да тұрғындарға қызмет көрсетемін. Бір күнде орташа 4-5 торт жасап, самса, пирогтар пісіремін, — дейді жеке кәсіпкер.
Бүгінде Келес өңірінде кәсіппен айналысып, оны отбасылық бизнеске айналдырғандар саны жыл сайын артып келеді. Нұржамал Асқарқызы да мемлекеттен қайтарымсыз грант алып, табысын еселеп отыр. Кәсіпке бейімделу – бүгінгі заман талабы. Ауыл тұрғындарының бұл бағыттағы қозғалысы көз қуантады.
