Түркістан облысы Мақтаарал ауданының жұмыспен қамту және әлеуметтік бағдарламалар бөлімінің ұйымдастыруымен 1 маусым — Халықаралық балаларды қорғау күніне арналып түрлі мерекелік іс-шаралар өтуде, деп хабарлайды аудан әкімінің баспасөз қызметіне сілтеме жасаған 4tagan.kz ақпараттық агенттігі.
Күні кеше Мырзакент кентіндегі оңалту орталығында бастау алған салтанатты жиын «Жиделі байсын» мейрамханасында балаларға арналған аудан әкімінің мерекелік дастарханына ұласты.
Ауданның жұмыспен қамту және әлеуметтік бағдарламалар бөлімінің басшысы Нұрғали Елшібаев балалардың сапалы білім алуы үшін, әсіресе мүмкіндігі шектеулі балаларды қорғау, қолдау және емдеу үшін мемлекет тарапынан түрлі жағдайлар жасалып жатқанын тілге тиек етті.
Іс-шаралар барысында «Мақтаарал» мәдениет үйінің ұйымдастыруымен мултфильм және ертегі кейіпкерлері мерекелік кештердің жоғары деңгейде өтуіне атсалысып, мүмкіндігі шектеулі балалар өз өнерлерін ортаға салды. Балалаларға үнемі қолдау көрсетіп, қайырымдылық жасауға атсалысып жүрген кәсіпкерлер, ұйымдар және үздік тәрбиешілер алғыс хатпен марапатталып, қошеметке бөленді.
Аудандық мәслихаттың депутаттары, ауыл әкімдері, білім беру және мүмкіндігі шектеулі балаларға тәрбие беру саласында жұмыс істеп жүрген мамандар балаларға арналған ізгі тілектерін айтты. Сондай-ақ, мерекеде балаларға түрлі сый-сияпаттар жасалып, ойыншықтар, балмұздақтар және пайдалы сусындар үлестірілді.
Айта кетейік, мақталы өңірде соңғы жылдары бала саны күрт артып, облысымызда демографиялық көрсеткіштерімен көзге түсіп келеді.
