Жастар практикасын оқуды енді бітірген, мамандығы бойынша әлі тәжірибесі жоқ, 35 жасқа дейінгі жастар қатыса алады. Тек оқу бітіргеніне үш жылдан аспаса болғаны. Бұған колледж бітірген жастар да қатыса алады.
Жастар практикасына қабылданған жас 12 ай бойы практикада болады. Жастар практикасына жолданған азаматтардың басым көпшілігі сол жұмыс атқарған мекемесінде тұрақты жұмысқа орналасып қалуда.
Ал орналаса алмағандарға басқа мекемеге тұрақты жұмысқа жолдау немесе шағын кәсіп ашу үшін мемлекеттік грант алу дегендей көмек түрлері де бар.
Жастар практикасына қатысқысы келген азамат Жетісай ауданының халықты жұмыспен қамту орталығына барып жұмыссыз ретінде тіркеледі. Орталық мамандары қатысудың шарттарын, қандай жұмыс орындары барын, бағдарлама ережелерін түсіндіреді. Ол үшін жеке куәлік, техникалық және кәсіптік, орта білімнен кейінгі, жоғары және жоғары оқу орнынан кейінгі білімі бар екенін растайтын құжатымен жұмыспен қамту орталығына өтініш береді. Жеке басын куәландырғаннан және «Еңбек биржасы» ААЖ-ға деректерді енгізгеннен кейін құжаттар өтініш берушіге қайтарылады.
Жастар практикасына келген азаматтың өзі де қай мекемеде тағлымдамадан өткісі келетінін айтып, өтініш білдірсе болады.
Жалақының бір айдағы мөлшері экологиялық үстемеақылар бойынша төлемдерді қоспағанда, салықтарды, міндетті әлеуметтік аударымдарды, пайдаланылмаған еңбек демалысына өтемақыларды және банк қызметтерін ескергенде кемінде 30 (отыз) айлық есептік көрсеткішті құрайды.
Жалақы толық мемлекет есебінен жүргізіледі.
Жастар практикасынан өту кезеңі азаматтың еңбек өтіліне есептеледі.
Жастар практикасына еңбек өтілін жинағысы келгендерге тағы бір мүмкіндік бар. Ол – «Алғашқы жұмыс орны» бағдарламасы. Яғни, азаматтың өзі таңдаған мекемесінде жұмыс тәжірибесінен өтіп, еңбек өтілін көбейте алады.
