Мемлекет басшысы жуырда ғана «Әділетті мемлекет. Біртұтас ұлт. Берекелі қоғам» атты Қазақстан халқына арнаған Жолдауында елімізде еңбекқор адам, кәсіби маман ең сыйлы адам болуға тиіс екенін, осындай азаматтар мемлекетімізді дамытатынын атап өткен болатын. Кеше Түркістан облысы жұртшылығымен кездесуінде осы мәселеге тағы тоқталды. «Біз құрып жатқан жаңа қоғамда еңбек адамы ең бірінші орында тұруы керек деген ұғымды жастарымызға түсіндіру қажет» деді Президент.
Жасыратыны жоқ, бүгінгі қоғамда құрылысшы, сылақшы, дәнекерлеуші, темір не ағаш ұстасы, сантехник, тігінші, диқан, шопан, бақташы, жылқышы, аула сыпырушы секілді қарапайым еңбек адамдарының еңбегі еленуден қалған. Күнделікті тіршілік үшін аса қажетті мамандықтар болғанымен, сол кәсіп иелеріне күнде күніміз түскенмен, қоғам тарапынан да, билік тарапынан да олардың еңбегін бағалап жатқан ешкім жоқ. Жылда газеттерге марапатталған адамдардың тізімі шығады. Сол тізімдерде өңкей шенеуніктердің ішінен бір жұмысшыны әзер табасыз. Шынтуайтында, еліміз осындай еңбекқор жандардың арқасында дамып жатыр. Еңбекқор адам елге сүйкімді, сыйлы, беделді келеді.
Ал, бүгінде, байқауымша, қара жұмысқа қол былғамай, ауадан ақша жасап, тез баюды, оқу бітіре сала бастық болуды қалайтын жастар көп. Президент соңғы уақытта жастардың еңбекке құлшынысын арттыру керек дегенді жиі айтып жүр. Оны біз де қолдаймыз. Ол үшін әрбіріміз отбасымызда балаларымызды еңбек етуге тәрбиелеуіміз керек. Жұмыстың үлкен-кішісі болмайды, бастысы – наныңды адалдап же! Әрбіріміз өзімізді, отбасымызды асырау үшін еңбек етіп, мемлекетке алақан жаймай табыс тапсақ, Отанымыздың дамып-өркендеуіне қосқан үлесіміз сол болмақ.
Т.ҚАНАЕВ,
«Ақорда» шаруа қожалығының төрағасы.
Алатау батыр ауылы, Шардара ауданы.
