Түркістан қаласының аумағында 39937 электр абонентінің тек 33 937 абоненті сапалы электр қуатымен қамтылған. Оның орташа сағат тұтыну мөлшері – 48,8 МВт/сағ. Өткен жылы 3 нысанның құрылысы жүргізіліп 90 пайыз жұмысы орындалды және 3897 абонент сапалы электрге қол жеткізді. Пайдаланушылардың қамту көрсеткіші 84,9 пайыздан 94,7 пайызға артты. Осылайша, қала әкімдігі тұрғындарды сапалы электр жарығымен қамтамасыз ету бағытында жұмыстарын жалғасытруда. Бүгінде электр энергиясының тұрмыс-тіршіліктің барлық бағытында қажетті ресурс болғандықтан елімізде электр энергиясын үнемдеп қолдану мақсатында бірқатар шаралар қолға алынуда.
Соңғы жылдары Қазақстан экономикасының даму үрдісі аясында аясында энергия тиімділігін арттыру, үнемдеу мәселесі жиі көтеріліп жүр. Энергетикалық мол мүмкіндіктерге қарамастан үнемдеу шараларын қолға алу – заман талабынан туған қажеттілік.
Энергияны үнемдеу мен энергия тиімділігін арттыру саясаты өнім өндіру барысындағы энергия ресурстарын тұтыну саласындағы нормативтерді реттеуді қажет етеді. Оған сай қуаттылық коэффициентіне, жобалау құжаттамасына қойылатын талаптар өзгертілмек. Аталмыш саясатқа байланысты энергия тиімділігі саласындағы міндетті талаптар көлікке, электр қозғалтқышына, әртүрлі типтегі ғимараттар мен құрылыстарға және архитектуралық шешімдерге қолданылады деп күтілуде. Ол нормаларды өндірістегі ірі кәсіпорындарда енгізу үшін энергия тиімділігін бағалауға энергетикалық аудит жүргізу бойынша талаптар жаңаша қойылуы тиіс. Әлбетте мұндай жаңашылдық қосымша білімге ие мамандарға мұқтаждық тудырады. Сондақтан энергия аудиторлары мен энергия менеджерлерін даярлайтын оқу орталықтарын ұйымдастыру ісі көлденең шығатыны түсінікті.
Мәселе алғаш 2010 жылдары көтеріле бастады. Елбасының сол жылғы Жолдауында экономиканың тұрақты және теңгерімді өсуі бойынша жаңа міндеттер қойыла келе, энергия үнемдеу саласында ЖІӨ-нің энергия сыйымдылығын 2020 жылға қарай кемінде 25 пайызға төмендету міндеті қойылған. Осыдан бастап Энергияны үнемдеу мен энергия тиімділігін арттыру мемлекеттің стратегиялық міндеттерінің біріне айналды. Міндеттерді орындау үшін барлық дерлік салалар мен аймақтарда энергия тиімділігін арттыру тапсырылды. «Энергия үнемдеу – 2020» бағдарламасы қабылданды.
Аталмыш саяси басымдық экономиканың түрлі тармағын жаңғыртып, өндіріс саласының сапасын арттыру, шетелдік инвестиция ағынын күшейту, бұқараны энергия көздерін үнемді де ұқыпты қолдануға шақыру шараларын қамтиды.
Энергия ресурстарын тұтыну елдің жалпы ішкі өсімі жоғарылаған сайын артып келе жатқаны байқалады. Ол түсінікті де. Экономикалық өсу деген сөз өндірістің өсуі, тұтынушылық қабілеттің өсуі. Жыл сайын елде жылу энергиясы, электр энергиясы, жанар-жағармай, көгілдір отын, қатты отын сияқты тұтыну ресурстарының қолданылуы арту үстінде. Бұл бір жағынан ел дамуының әрі халықтың әл-ауқатының пропорционалдық өсімінің көрсеткіші.
Энергияны үнемдеу мен тиімділігін арттыру автоматты түрде жаңғырту жұмыстарын жандандырады. Ол қалай? Мәселен, инновациялық жаңалықтарды, жаңа технологияларды енгізу арқылы өндіріс жаңарады. Құрылыс, әсіресе баспана құрылысында инженерлік-коммуникациялық инфрақұрылымды қайта құру және жаңғырту жұмыстары жүргізіледі. Көлік саласында ескі автокөліктер шектеліп, жаңа темір тұлпарлардың нарықты жаулауынан отандық автопарк жаңарады.
Бұл тек экологиялық ахуалды жақсартып қана қоймай, әр қазақстандықтың әл-ауқатын да арттырады.
«4tagan.kz- ақпарат»
