Ордабасы ауданының әкімі Нұрбек Бадырақов бекітілген кестеге сәйкес Жеңіс ауылдық округінің тұрғындарымен кездесті.
Аудан басшысы алдымен екі ай алдынғы кездесуде жеңістіктер тарапынан айтылған ұсыныстардың орындалуына тоқталды. Ол кезде бас-аяғы 17 ұсыныс білдірілген болатын. Оның үшеуі орындалып, 6-уы орындалу үстінде болса, қалған 8-і ауданның бес жылдық даму жоспарына енгізілген.
— Өздеріңізге белгілі, қазір ауданымызда елді мекендерді газдандыру жұмыстары қарқын алған. Жеңіс ауылын даму жоспарына сәйкес газбен қамту 2024 жылға жоспарланып отыр. Жол салу жұмыстары да аталған жоспарға сәйкес жүргізілетін болады. Дихан ауылындағы көше жарық шамдарын орнату 2024 жылы жүзеге асырылатын болады. Жер қатынастарына қатысты мәселелер де рет-ретімен шешіліп келеді. Дихан, Жеңіс ауылдарында балалар ойын алаңшасын, спорт алаңшасын салу бойынша да тиісті жұмыстар жүргізіліп жатыр. Бұйыртса Дихан ауылындағы балалар алаңшасы жыл соңына дейін пайдалануға беріледі, — деді аудан әкімі.
Кездесуде аудан басшысы тұрғындарға әр салада атқарылып жатқан жұмыстар мен алдағы жоспарлар туралы толыққанды ақпарат беріп, еткен еңбекпен берекелі ел болып отырған жеңістіктерге шынайы алғысын білдірді.
Шара соңында тұрғындар жас та болса бас болып жүрген аудан басшысының жұмысына оң бағасын беріп, игі бастамаларға қолдауларын білдіретіндіктерін жеткізді.
