Бұл туралы Ордабасы ауданының әкімі Нұрбек Бадырақов Бөген ауылдық округінің тұрғындарымен болған кездесуде айтты.
Қазіргі таңда мердігер мекеме тиісті 22,3 шақырым газ құбырының 20 шақырымға жуығын тартып қойған. Нысан келесі жылға өтпелі. Сәтін салса, 2023 жылы бөгендіктер отын жағып, күл тасудан арылатын болады.
Жалпы, осыдан екі ай бұрын бөгендіктермен болған алғашқы кездесуде аудан әкіміне 14 ұсыныс айтылған. Оның екеуі орындалып, төртеуі орындалу үстінде. Қалғаны ауданның 2023-2027 жылдарға арналған даму жоспарына енгізілген.
2023 жылы Кемер мен Бөген елді мекендерінің көшелері жарықтандырылады. Ал, 2025 жылы аталған екі ауылға лотоктар орнатылып, ағын сумен қамтамасыз етілетін болады. Сондай-ақ 2023 жылға Бөген ауылына ФАП салу үшін тиісті басқармаға ұсыныс берілген.
— Даму жоспарына сәйкес өздеріңіз көтерген мәселелердің дені шешімін табатын болады. Кейбір жобаларды кейінге қалдырмай, жақын жылдарға жылжытуды қарастырып көреміз. Мүмкін болып жатса көпке созбауға тырысамыз. Бастысы Бөген ауылдық округіндегі мәселелер белгілі. Әр ауыл бойынша карта әзірленген. Ең алдымен маңызды делінген шаруаларды шешіп алуымыз қажет. Қалғандары рет-ретімен шешіледі, — деді аудан әкімі.
Кездесу соңында бөгендіктер түрлі мәселелер бойынша сауалдарын қойды.
