Түлкібас ауданына қарасты Шерхан Мұртаза атындағы мектепте Шерхан Мұртаза атындағы қайырымдылық қордың ұйытқы болуымен «Тұғыры биік тұлға» атты ғылыми-танымдық конференция өтті.
Биыл қазақ әдебиеті мен журналистика саласында өшпес із қалдырған белгілі қаламгер Шерхан Мұртазаның туғанына 90 жыл толып отыр. Шараға аудан әкімінің орынбасары М.Жанесен, ауданның және Жамбыл облысының ғалымдары, жазушылары, сондай-ақ өңірдің зиялылары қатысты.
«Түркі әлеміне қызметі үшін» сыйлығының лауреаты, абайтанушы, жерлесіміз М.Мырзахметұлы бастаған бір топ ғалымдар мен жазушылар ұлы тұлғаның шығармалары мен еңбегі жайында баяндамалар жасап, дара тұлғаның тағылымды өмір жолынан келелі әңгіме айтты.
Сонымен қатар, мерейтойлық жиында келген қонақтарға «Ұлттық құндылықтар — ұлт қазынасы» және «Ұлттық Рухтың жаршысы» атты тақырыптарда қолөнер бұйымдары мен кітап көрмесі ұсынылып, мектептің мұражайы таныстырылды.
Қызықты ақпараттардың бірі, Шерхан Мұртазаның Оңтүстік өңіріне жолы түссе, міндетті түрде Түлкібас ауданына арнайы сапарлап келетін болған екен.
Түркістан облысының Өңірлік коммуникациялар қызметі
