Қазіргі заманның басты талаптарының бірі — барлық қызметтің цифрлық форматқа көшуі. Соңғы үш жылда тұрғындарға ұсынылатын мемлекеттік қызметтердің 90 пайыздан астамы онлайн режимге көшірілді. Бұл — уақытты үнемдеп қана қоймай, адами факторды азайтады.
Электронды үкімет порталы арқылы жер кезегіне тұру, әлеуметтік төлем алу, кәсіпкерлікке рұқсат құжаттарын рәсімдеу, медициналық жазба алу бұрынғыдан әлдеқайда жеңілдеді. Бұл қызметтерді тұрғындар смартфон арқылы-ақ пайдалана алады.
Цифрландыру саласындағы тағы бір үлкен жетістік — ауылдық округтердің әкімдіктерінде фронт-офистердің ашылуы. Тұрғындар құжат өткізу үшін аудан орталығына бармай-ақ, өз ауылында қызмет ала алады.
Мектептерде электронды журнал мен күнделік толық енгізілді. Бұл ата-аналар үшін үлкен жеңілдік. Олар баласының бағасын, қатысуын, үй тапсырмаларын онлайн бақылай алады.
Медицина саласында да электронды кезек жүйесі, емделуші картасы енгізілді. Тұрғындар дәрігерге бару уақытын алдын ала таңдай алады. Бұл емханадағы кезек санын айтарлықтай азайтты.
Цифрландыру — болашақтың талабы. Бұл бағыттағы жұмыстар жалғаса береді.
