Бүгін Сайрам ауданының әкімі Арман Сабитовтың төрағалық етуімен кәмелетке толмағандар арасындағы құқықбұзушылықтың, суицид пен ерте жүктіліктің алдын алу мәселелері туралы комиссия отырысы өтті. Онда аудандық полиция басқармасы бастығының орынбасары Руслан Ендібаев жастар мен жасөспірімдер арасындағы қылмыс пен құқықбұзушылық жайында баяндама жасады. Биылғы бес айда жасөспірімдер тарапынан 2 қылмыс жасалып, 23 құқықбұзушылық тіркелген. 35 жасөспірім мен 30 жайсыз отбасы профилактикалық есепке қойылып, жүйелі бақылау жүргізілуде.
Ал, аудандық білім бөлімінің басшысы Бауыржан Ахметов білім ошақтарындағы қауіпсіз орта қалыптастыру бағытында мыңнан аса түсіндіру жұмысы ұйымдастырылғанын баяндады. Мектептерде тәуекел топтағы оқушылармен тұрақты психологиялық түзету шаралары өткізіліп, мобильдік топ пен педагог-психологтардың көмегімен 25 мыңнан астам оқушы қамтылған.
Сайрам аудандық орталық ауруханасы ана мен бала денсаулығын қорғау жөніндегі басшының орынбасары Ләйлә Қарасаева өз баяндамасында суицид пен ерте жүктіліктің алдын алу шаралары күшейтілгенін атап өтті. Өкінішке орай, ағымдағы жылдың қазіргі таңына дейін өзіне-өзі қол жұмсау дерегі артқан. Ерте жүктілік көрсеткіші өткен жылмен осы кезеңімен салыстырғанда 14-тен 3-ке дейін азайған.
«Отбасын қолдау орталығы» консультациялар беру және кешенді сүйемелдеу бөлімшесінің меңгерушісі Ғалым Медеуовтің мәліметінше, аталған маңызды мәселелерге байланысты мекеме тарапынан 38 алдын алу іс-шарасы өткізіліп, тұрғындарға құқықтық, әлеуметтік және психологиялық қолдау көрсетілген.
Мәжіліс соңында аудан әкімі Арман Сабитов: «Бүгінгі мәжілістің күн тәртібіндегі мәселелер қоғамдағы ең өзекті болып отыр. Еліміздің болашағы санатын жастар арасындағы өзіне өзі қол жұмсау, оларға қарата жасалған қылмыстың артуы қоғамды алаңдататын мәселе. Қазіргі таңда осы бағыттағы жұмыстар атқарылып жатыр. Дегенмен, өз деңгейінде емес. Оны айғақтар көрсетіп отыр. Ендігі міндет – осы мәселелердің алдын алу бойынша анализ жасау керек. Арнайы жұмысшы топпен бірге жұмыстар одан әрі жүйелі жүргізіп, жұмылып жұмыс істеуіміз қажет», — деп, нақты тапсырма берді.
