“28 маусым – Бұқаралық ақпарат құралдары қызметкерлері күніне” орай, аудан әкімі Арман Абдуллаев БАҚ өкілдерін қабылдап, кәсіби мерекелерімен құттықтады.
Кездесу барысында аудан әкімі ақпарат құралдары өкілдеріне қоғамдағы, әсіресе жергілікті деңгейдегі шынайы ақпарат таратудағы рөлі мен маңызын ерекше атап өтті.
-Бұқаралық ақпарат құралдары – қоғам мен билік арасындағы алтын көпір. Халықтың сеніміне ие болып, шынайы әрі объективті ақпарат жеткізу – үлкен жауапкершілік. Сіздердің кәсіби еңбектеріңіз арқылы ауданымыздағы оң өзгерістер мен жетістіктер кеңінен насихатталып келеді, – деді Арман Абдуллаев.
Мерекелік шара соңында ауданның медиа саласына үлес қосып жүрген бірқатар тілшілер мен редакция ұжымдарына алғыс хаттар табысталды.
Сонымен бірге, Сарыағаш ауданының әкімі Арман Абдуллаев БАҚ өкілдеріне құттықтау жолдаған болатын.
«Құрметті Бұқаралық ақпарат құралдарының өкілдері! Қымбатты ардагер журналистер!
Сіздерді 28 маусым – Бұқаралық ақпарат құралдары қызметкерлері күнімен шын жүректен құттықтаймын!
Бүгінгі күні еліміздің бұқаралық ақпарат құралдары азаматтық қоғамның құрамдас бөлшегі ретінде билік пен бұқараның арасындағы дәнекер ғана емес, еліміздің толағай табыстары мен зор жетістіктерінің жаршысы болып келеді.
Газет, теледидар, интернет кеңістігі – уақыт айнасы. Ол арқылы күн сайын тың деректер алып, мемлекетіміздің дамуын, облысымыздың тыныс-тіршілігін қадағалап отырамыз. Аудандағы жаңа бастамалар, жарқын істер немесе тосын оқиғалар тілшілер қауымының назарынан тыс қалған емес. Мемлекеттің әлеуетін нығайту, экономиканы дамыту, азаматтардың тұрмыс сапасын арттыру – бүгінде еліміздің алдында тұрған маңызды міндеттер екенін айтқан Мемлекет басшысы Қасым-Жомарт Тоқаев отандық медиа-қауымдастықтың сындарлы негізде ұйысуы, журналистердің белсенді азаматтық ұстанымы, олардың кәсіби деңгейі және әділдігі – ақпараттық кеңістіктегі табысты жұмыстың негізгі шарттары екенін айтқан.
Еліміздің татулығы мен тұрақтылығының өрістеп-өрлеуінің қарқынын паш ететін журналистер қашанда құрметке лайық.
Мерейлі мереке құтты болсын, ұшқыр қалам иелері! Жазарларыңыз көп, қаламдарыңыз қуатты, сөздеріңіз өтімді, еңбектеріңіз жемісті болсын! Сіздерге шабыт пен шығармашылық табыс, бақыт және отбасыларыңызға амандық тілеймін!», делінген құттықтауда.
