Бүгінгі күні қоғамды цифрландырудың маңызы орасан зор. Онлайн-режимде мемлекеттік, сондай-ақ банктік және өзге де қызметтерді алуға болады. Өкінішке орай, мұны алаяқтар белсенді пайдалануда. 2024 жылы республика көлемінде 17 мыңнан астам интернет-алаяқтық тіркелген. Алаяқтардың әрекетінің нәтижесінде азаматтарға 28,7 млрд. теңгеге жуық шығын келтірілген.
Түркістан облысы Кентау қаласы тәртіп сақшыларының ұйымдастыруымен интернет алаяқтықтың алдын алу бойынша шара өткізілді. Полицейлер арнайы қатты дыбыс бергіш автокөлік арқылы қала ішінде адамдар көп шоғырланатын орындарда түсіндірме жұмыстарын жүргізді.
Атап айтқанда базар, авто тұрақ пен көпқабатты үйлердің арасында қала тұрғындарына 2200 брошюра таратылды. Өз кезегінде қалада орнатылған лэд экран арқылы тәулігіне 21 рет жарнама көрсетіліп, онда интернет алаяқтықтың алдын алуға бағытталған бейнероликтер берілуде.
Сонымен қатар, интернет алаяқтық қазіргі қоғамның ең өзекті әрі маңызды мәселесіне айналғанын айтты. Ол интернет арқылы сауда жасау және қызмет көрсету, сондай-ақ өздерін банк қызметкері ретінде таныстырып, жеке деректерді иемдену және бөтен біреудің атынан онлайн-несие рәсімдеу арқылы жасалатын қылмыстардан сақ болуға шақырды.
Интернет алаяқтық: сақ болыңыз!
Қазіргі таңда интернет алаяқтық түрлері күн санап артып келеді. Алаяқтар жеке деректерді, банк карталарының мәліметтерін иемдену үшін түрлі айлалар қолданады. Әлеуметтік желілерде фейк аккаунттар ашып, жеңіл табыс ұсыну, сыйлық немесе жүлде ұтып алдыңыз деген хабарламалар тарату секілді әдістер кең таралған.
Осындай жағдайлардың құрбаны болмас үшін қауіпсіздік шараларын сақтау маңызды. Күмәнді сілтемелерге өтпеңіз, жеке мәліметтеріңізді бейтаныс адамдарға жібермеңіз және ресми емес сайттарда төлем жасамаңыз. Киберқауіпсіздік – әркімнің өз жауапкершілігінде!
