«Аnti-fraud» республикалық жедел-профилактикалық іс-шарасы аясында Түркістан облысы ПД «Cyberpol» киберқылмысқа қарсы іс-қимыл басқармасының қызметкерлері интернет-алаяқтықтың алдын алу бойынша түсіндіру жұмыстарын жүргізуде, деп жазады Түркістан облысы полиция департаментінің баспасөз қызметіне сілтеме жасаған 4tagan.kz ақпараттық агенттігі.
Мәселен тәртіп сақшылары Арыс және Сауран аудандары аумағында халықпен кездесулер ұйымдастырып, азаматтарға интернет-алаяқтықтың алдын алу шаралары туралы, алаяқтардың түрлі қулықтарынан қалай аулақ болу керектігі туралы түсіндірді. Сондай-ақ бейнероликтер көрсетіп, ақпараттық жаднамалар таратты.
Өз кезегінде полицейлер азаматтарды алаяқтық құрбаны болмау үшін мұқият болуға шақырады. Күмәнді сілтемелер мен SMS-терді қабылдамауды, жеке деректер мен банк карталарының нөмірлерін бейтаныс адамдарға жібермеуге кеңес береді.
ІІМ онлайн сатып алу кезіндегі ықтимал қауіптер туралы ескертеді.
Ішкі істер министрлігі азаматтарға үндеу жасады, — деп хабарлайды Polisia.kz. Жаппай жеңілдіктер, әртүрлі мерекелерге арналған жалпы сатылымдар кезінде азаматтар алаяқтарға алданып қалуы мүмкін. Мысалы, ақпан айында көптеген елдерде «ғашықтар күні» атап өтіледі. Осыған орай адамдар өздерінің сүйіктілеріне сыйлық жасауды жоспарлап жатады. Қаражаттан айырылып қалмас үшін ІІМ қарапайым ережелерді сақтауды ұсынады:
— Тауарды тек тексерілген сайттардан немесе ресми маркетплейстерден сатып алыңыз.
— Тым төмен бағаға қызықпаңыз. Егер жеңілдік күмәнді көрінсе, бұл алаяқтық болуы мүмкін.
— Егер әлеуметтік желілерде «қызықты» ұсынысқа тап болсаңыз, дүкен немесе сатушы туралы мәліметтерді тексеріп алыңыз. Бұл жағдайда қалдырылған пікірлерге, тіркелушілердің санына және бөліп төлеу мүмкіндігіне назар аударған абзал. Алайда оның кепіл бола бермейтінін де есте ұстаған жөн.
— Сатушыға бейнеқоңырау шалу арқылы өнімнің бар екеніне көз жеткізіңіз. Дүкеннің мекенжайы мен орналасқан жерін көрсетуді талап етіңіз. Егер бұл алаяқтар болса, олар түрлі сылтаулармен талаптардан бас тартып, сендіру үшін геолокация жібереді, бірақ бұл ықтимал алаяқтың айласы.
— Төлем әдістерін тексеріңіз. Ақшаны жеке шоттарға жібермеңіз.
— Жеке деректерді қадағалаңыз. Ешқашан құпия сөздерді, SMS-кодтарды және карта деректерін бөгде адамдарға бермеңіз.
— Мұқият болыңыз! Егер сізде күмән туындаса, ақпаратты тексеріңіз немесе сарапшылармен кеңесіңіз, — деді ІІМ.
