Түркістан облысының полициясы интернет-алаяқтықтың кең таралған түрлері, алаяқтардың жиі қолданатын әдістері және оларға қарсы сақтық шараларын түсіндіру мақсатында колледж студенттерімен кездесу өткізді, деп жазады Түркістан облысы полиция департаментінің баспасөз қызметіне сілтеме жасаған 4tagan.kz ақпараттық агенттігі.
Кездесу барысында Кентау қаласы полиция бастығының бірінші орынбасары Азамат Сәрсенқұлов студенттерге қылмыстық және әкімшілік құқық бұзушылықтардың жауапкершіліктерін, соның ішінде жасөспірімдер арасындағы буллинг, зорлық-зомбылық, бопсалау, есірткіге қатысты қылмыстардың зардабын түсіндірді.
Сондай-ақ студенттерге жеңіл ақша ешқашан болмайтынын, алаяқтық деректерінен қалай сақтану керек екенін ашық айтып, арнайы бейнематериалды көрсетті. Статистикалық мәліметтерге сүйенер болсақ, жыл басынан бастап Кентау қаласында 5 студент интернет-алаяқтарының құрығына түскен. Ал алаяқтарға жәбірленушілерден түсетін ақшаны алу үшін банк карталарын сатып, қылмыс жасауға көмек берген 3 дроппер анықталған.
Шара соңында полицейлер бейтаныс адамдардан келген күмәнді сілтемелерге өтпеуге, жасалатын қылмыстардан қорғану жолдары мен алаяқтыққа ұшыраған жағдайда қандай әрекет ету керектігін де айтып өтті.
