«Ұлы дала елі» орталығында Түркістан жоғары көпсалалы, қол өнер колледжінің 90 жылдығына орай және аталған музей орталығымен әлеуметтік серіктестікті нығайту мақсатында «Түркістан өңірінде туризмді дамыту бағыттары» тақырыбында пікірсайыс өтті.
Бірлесе ұйымдастырылған іс-шараға қатысушылар екі фракцияға бөлініп, тақырыпты талқылай түсті. Оң жақ фракция Түркістан өңірінде туризмді діни және зиярат ету бағытында дамыту позициясын, ал сол жақ фракция Түркістан өңірінде туризмді түрлі бағыттар, атап айтқанда экологиялық, мәдени-танымдық, іскерлік, ойын-сауық бағыты бойынша позициясын ұстанды. Алғашқы тарап Түркістан өңірінде тарихи ескерткіштердің едәуір көп бөлігі орналасқандықтан тарихтан қалған жәдігерлерді насихаттай отырып, өңірде туризмді діни және зиярат ету бағытында дамыту қажеттілігін ерекше атап өтіп, келген туристерге салт-дәстүрлерімізді көрсете алу мүмкіндігі бар екендігін ұсыныс ретінде алға тартты. Келесі тарап Түркістан өңірінде тарихи ресурстар мен табиғи объектілердің бар екендігін ескеріп экологиялық туризмді және қалада түрлі халықаралық іс-шаралардың жиі өтуіне байланысты іскерлік туризмді дамыту, сонымен қатар келген туристердің сұранысын ескере келе ойын-сауық орталықтарын ұйымдастыруды ұсыныс ретінде жеткізді.
Екі жақ фракция мүшелері нақты статистикалық мәліметтер мен дәйектерді келтіре отырып, өз ойын тұщымды жеткізе алды. Өзара сұрақ-жауап алмасып, пікірсайысты одан әрі қыздыра түсті. Пікірсайыс өз мәресіне жеткенде туризм саласының маманы Тұрсынхан Абдукаримов өңірдегі туристік ахуалдың қазіргі жағдайына байланысты өз ойымен көпшілікпен бөлісті. Қазылар алқасы бірауыздан осындай пікірсайысқа қатысқандарға өз ризашылығын білдіре отырып, алғыс хатпен марапаттады.
