Бүгін «Ұлы Дала Елі» орталығында Түркістан облыстық мәдениет және туризм басқармасының ұйымдастыруымен «Тіл оқытудағы жаңа көзқарас: әдістеме мен тәжірибе» облыстық семинары өтті. Аудандық, қалалық тілдерді оқыту орталықтарының әдіскерлері мен қазақ тілі оқытушыларының және тіл мамандарының қатысуымен өткен семинарда Халел Досмұхамедов атындағы Атырау университетінің Халықаралық әріптестік және интернационализация бөлімінің басшысы, PhD Қарлығаш Әшірханова модераторлық етті.
Шарада алғаш боп сөз сөйлеген облыстық мәдениет және туризм басқармасының бөлім басшысы Нұргүл Жақсылықова қатысушыларға сәттілік тілеп, семинар мақсатына тоқтала кетті.
– Өздеріңізге белгілі, инновация – жаңалыққа талпыну. Тілді жан-жақты меңгертуде ақпараттық технологиялардың мүмкіндігін тиімді қолдана білу, тіл үйретудің жаңа әдістерін әзірлеу қазіргі кезеңде ең өзекті мәселелердің бірі. 2023 жылғы 16 қазанда Қазақстан Республикасы Үкіметінің қаулысымен «Қазақстан Республикасында тіл саясатын дамытудың 2023-2029 жылдарға арналған іс-қимыл жоспары» бекітілді. Тұжырымдаманың негізгі мәселелерінің бірі қазақ тілін ғылым тілі ретінде дамыту, қазақ тілін оқыту әдістемесін жетілдіру, деңгейлер бойынша лексикалық және грамматикалық минимумдар, оқулықтар, оқу-әдістемелік құралдар әзірлеу жоспарланған. Облыста 17 аудандық, қалалық тілдерді оқыту орталығы бар. Орталықтарда 22 әдіскер, 31 қазақ тілі, 17 орыс тілі, 27 ағылшын тілі маманы жұмыс істейді. Тіл оқыту орталықтарында 7226 адам тіл үйренуде, – деді өз сөзінде Нұргүл Асқарқызы.
Семинар барысында педагогика ғылымдарының докторы, профессор Қарлығаш Қадашева «Қазақ тілін деңгейлеп оқыту әдістемесі» тақырыбында, Қ.А.Ясауи атындағы ХҚТУ-нің Әлем тілдері кафедрасының аға оқытушысы Майра Исрайлова «Пути реализации навыков речевой деятельности» тақырыбында, Түркістан қаласы химия-биология бағытындағы Назарбаев Зияткерлік мектебінің ағылшын тілі пәнінің мұғалімі Айнұр Аманбаева «Ағылшын тілін оқытуда ақпараттық коммуникативтік технологияларды тиімді пайдалану» тақырыбында өз тәжірибесімен бөлісіп, тіл оқытудың тиімді әдіс-тәсілдерін ұсынды.
Айта кетейік, семинар мақсаты – ҚР тіл саясатын дамытудың 2023-2029 жылдарға арналған тұжырымдамасын іске асыру жөніндегі іс-қимыл жоспарына сәйкес аудан, қаладағы тілдерді оқыту орталықтарының оқытушылары мен әдіскерлерінің біліктілігін арттыру, үш тілді біліктілікті арттыру, оқыту әдіснамасын жетілдіру, озық тәжірибені зерделеу және оқытудың заманауи әдістері мен технологияларын қолданысқа енгізу.
