«Республика күні елдің мемлекет құру жолындағы тарихи қадамының символы болуы керек. Әрине, Тәуелсіздік күнінің бастапқы мәні сақталады. Бұл күн мемлекеттік мереке болып қала береді. Бірақ тәуелсіздік алуға зор үлес қосқан ұлттық батырларымызға тағзым күні ретінде атап өтілуі керек», деді Мемлекет басшысы мереке жөнінде. ҚР Президенті Қасым-Жомарт Тоқаевтың Жарлығымен қайта оралған Республика күні мерекесін дәстүрлі түрде атап өту жалғасуда. Араға 13 жыл салып ел тарихындағы айшықты күн, халықпен қайта қауышуына орай, Төлеби аудандық Мәдениет үйінде салтанатты жиын өтті.
Халқымыздың рухын көтеріп, елдігімізді нығайтатын, бірлігімізді бекемдеп, ынтымағымызды арттыратын айшықты мереке қарсаңында бірқатар азаматтар ауданның әлеуметтік-экономикалық дамуына қосқан үлесі үшін облыс әкімінің, аудан әкімінің, «AMANAT» партиясының Алғыс хаттары мен аудандық мәслихаттың Грамотасымен марапатталды.
Аудан жұртшылығын ұлттық мерекемен аудан әкімінің орынбасары Сержан Дүйсебаев, аудандық мәслихат төрағасы Нұрлан Қойбағаров, аудандық ардагерлер кеңесінің төрағасы Әтірхан Шыңғысбаев құттықтап, ел игілігі жолында еңбек етіп жүрген азаматтарға алғыстарын жеткізді.
— Ел экономикасын, халықтың әлеуметтік-тұрмыстық жағдайын, мәдениетін дамыта түсу жолында білек сыбана отырып, татулықтың арқасында еңбек ете берсек дейміз. Алдымызда әлі де атқарылар істер мен міндеттер тұр. Халық болып бірігіп татулықты ту етіп жұмыс атқарсақ, асар асуымыз бен шығар биігіміз көп болмақ. Біздің бір ғана Отанымыз бар, ол тәуелсіз Қазақстан. Халқымыз өзінің болашағы мен балаларының тағдырын мемлекетімізбен ғана байланыстырады. Еліміздің әрбір азаматы мемлекет тарапынан жасалған қамқорлықты сезініп, игі істердің ұйытқысы болуда. Республика күнімен шын жүректен құттықтай отырып, бостандық пен еркіндіктің бастауы болып табылатын осы салтанатты күні Сіздерге игілік пен бақыт, бақ-дәулет, ырыс тілеймін, деді құттықтау сөзінде Сержан Дауылбайұлы.
Тәуелсіз еліміздің жарқын мерекесі құрметіне аудандық Мәдениет үйінің өнерпаздары, аудандағы ұлттық мәдени орталықтары әннен шашу шашып, тұрғындарға мерекелік көңіл-күй сыйлады.
МЕМЛЕКЕТТІК ТУ КӨТЕРІЛІП, ӘНҰРАН ШЫРҚАЛДЫ
Төлеби ауданының орталығы Ленгір қаласындағы Төлеби саябағында Республика күніне арналған Мемлекеттік ту көтеру салтанатты рәсімі өтті.
Аудан әкімінің орынбасары Сержан Дүйсебаев жиынға қатысушыларды Республика күнімен құттықтап, бұл күннің егемен еліміз үшін айрықша мерейлі әрі маңызды екенін атап өтті.
Мерекелік шара Мемлекеттік Әнұранмен ашылып,
халқымыз үшін қашанда ерлік пен елдіктің символы саналған ту көкке көтерілді.
Еліміздің барлық аумағында қазақ елінің көгінде Ұлы даланың айбынын асырған Тәуелсіздік туы желбіреді. Көк байрағымыз – мызғымас мемлекеттіліктің белгісі, Елтаңбамыз – азаттықтың айшықты көрінісі. Ал, Әнұранымыз – еркіндік пен елдіктің үні ретінде шырқалды.
РЕСПУБЛИКА КҮНІНЕ ОРАЙ ЖҮГІРУДЕН МАРАФОН ӨТТІ
Төлеби ауданының орталығы Ленгір қаласында Төлеби Әлібекұлының 360 жылдығына және 25 қазан Республика күніне орай, «Спорт — денсаулық кепілі» ұранымен 18 жастан асқан аудан тұрғындары арасында жүгіру марофоны өтті. Марафонға қатысушылар 3 км жерді жүгіріп өтіп, өздерінің мықтылық, төзімділік, ептіліктерін көрсете білді. Аудан тұрғындары арасында спортты насихаттай отырып, салауатты өмір салтына баулу мақсатындағы жүгіру марафонының жеңімпаздарын аудан әкімі Төлеген Телғараев, аудандық мәслихат төрағасы Нұрлан Қойбағаров, аудандық ардагерлер кеңесінің төрағасы Әтірхан Шыңғысбаев құттықтап, спортты жарына серік еткен жандарға медаль, кубок табыс етті.
— Республика күні қарсаңында ұйымдастырылып отырған аудандағы бұқаралық спортты дамыту бағытындағы марафонға қатысушыларға алғысымды білдіремін. Аудан аумағында жеңіл атлетиканы дамыту мақсатында қолға алынған марафон қазір қоғамдық сипат алып, жыл өткен сайын қатысушылар саны артуда. Салауатты өмір салты — бұл ең әуелі денсаулықты сақтауға және нығайтуға бағытталған сауықтыру жолындағы белсенді іс-әрекет. Сондықтан, баршыңызға қозғалыс белсенділігін дұрыс ұйымдастыру арқылы организмнің жұмысқа қабілеттігін жоғарылатуды ұсынамын, деді құттықтау сөзінде аудан басшысы.
300 ге жуық ерлер мен әйелдер арасында барлық жас санаттары бойынша үздік үштікке ие болған жеңімпаздар медаль, мақтау қағаздары және естелік сыйлықтармен марапатталды.
