Сарыағашта аудан әкімдігінің ұйымдастыруымен «Батамен ел көгерер» дәстүрлі батагөй қариялар байқауы өтті. Байқауға аудан әкімі Арман Абдуллаев қатысып, ізгі лебізін арнады.
– Халқымыз «Батамен ел көгерер, жаңбырмен жер көгерер», «Баталы ер арымас, батасыз ер жарымас», «Жақсы сөз – жарым ырыс» деп текке айтпаған. Адамның адамдығын тілеуіне, пейіліне қарап өлшейтін қазақ баласы айтылған сөзге, тілеген тілекке, берілген батаға ерекше мән берген «Қарттары бар ел – қазыналы ел» демекші, ұрпақтарын ізгілікке жетелеп, ақ батасымен әр шаңырақты шуаққа жақсылыққа, бөлейтін қариялар – біздің асыл қазынамыз, даналықтың дариясы, абыз, асыл жандар! Сіздерге сәттілік тілеймін, – деді аудан басшысы.
Ұрпағын ізгілікке жетелеп, ақ батасымен әр шаңырақты шуаққа, жақсылыққа бөлейтін бұл сайыс 2010 жылдан бері тұрақты түрде өтіп келеді. Қатысушы 20-ға жуық ақсақал қолданыстан шығып бара жатқан баталарды жатқа айтып, әрқайсысы әртүрлі номинациялар бойынша дипломдар мен арнайы сыйлықтар алды.
Бата айтылатын үйден ырыс-несібе, береке арылмақ емес. Салт-дәстүрлердің ішіндегі ең асылы, көңілдің сәнін келтіріп, өмірдің мәнін ұғындыратын рухани құндылығымыз ол – бата деп айтсақ еш қателеспейміз. Сонымен қатар халықтың ризашылығына ие болған мұндай іс-шара салт-дәстүрді дәріптеуде, жастардың рухани байлығын арттыруда маңызды орын алары сөзсіз.
