Келес ауданында өндірілген аумақтық жалпы өнім көлемі өткен жылы 107,5 млрд теңгені құрады. Оның ішінде, ауылшаруашылығы саласының үлесі 65,5%-ды құрап отыр. Ал ағымдағы жылдың 8 айында жалпы өнім көлемі 55,8 млрд. теңгеге жетсе, жыл қорытындысы бойынша 119,3 млрд теңгеге жеткізу жоспарлануда. Сонымен қатар, өзіндік кірістердің жоспарын жыл соңына дейін 3,2 млрд теңгеге ұлғайту жоспары тұр. Бұл туралы Келес ауданының әкімі Жәнібек Ағыбаев аудандық мәслихаттың кезекті ІІІ сессиясында мәлімеді.
— Өткен жылы негізгі капиталға тартылған инвестиция көлемі 17,6 млрд.теңгені құрады. Биылғы жылға көрсеткіштерді көтеру бойынша талдау жұмыстары жүргізіліп, орындау бойынша нақты іс шаралар атқарылады. 2023 жылдың 8 айында орындалуы 7,6 млрд. тенгені құрап, жыл соңына дейін 22,9 млрд.тенгеге жеткізу жоспарланған. Сонымен қатар, ауданда 2023-2025 жылдары жалпы құны 51 млрд. теңгеге 4 инвестициялық жобалар іске асырып, 940 адамға жаңа жұмыс орындарын ашу жоспарланған. Ауданымыздың негізгі драйвері – ауылшаруашылығы саласы болып табылады. Аудан аумағында жалпы 26 мың гектар суармалы егіс алқаптары орналасқан. Алдыңғы қатарлы озық технологияны қолдана отырып, жылына 2-3 өнім алу бойынша былтыр 350 шаруа қожалық жалпы 1,5 мың гектарға егіс егуде. 2027 жылы бұл көрсеткішті 4 мың гектар алқапқа егіс егу жоспарлануда. Жаңа технологияларды енгізу және ағын суды үнемдеу мақсатында былтыр 348 гектар тамшылатып суғару әдісі енгізілді. Бұл әдіс негізінен алма бауларына қолданылған. 2027 жылға 3 мың гектарға тамшылатып суғару әдісін енгізу жоспарлануда, — деді аудан басшысы өз баяндамасында.
Кезекті сессияда он жеті мәселе қаралып, соның ішінде аудан әкімінің ағымдағы жылы атқарылған жұмыстары мен алдағы тұрған міндеттері туралы есебі тыңдалды. Аудан басшысы өз баяндамасында инвестиция, ауылшаруашылығы, инфрақұрылым, білім, спорт, құрылыс салаларында атқарылған жұмыстарға тоқталып, алдағы жоспарларымен бөлісті.
