Кентау қаласының әкімі Жандос Тасовтың төрағалығымен өткен жиында қала ішінде шұғыл қызметтердің жедел әрекет етуіне кедергі келтіретін жайттар анықталған. Бұл бойынша қалалық төтенше жағдайлар бөлімінің басшысы С.Төлегенов баяндаған.
Атап айтқанда, қаладағы қысқа көшелердің маңына, базардың аумағында көлік құралдарын ретсіз қойылуы, көпқабатты тұрғын үй ғимараттар ауласында ағаш бұтақтарының ретсіз өсуі, автокөліктерге кіруге арналған жолдардың уақытша бөгде заттармен қоршалуы, көше бойларында қандайда бір жөндеу жұмыстары кезінде арнайы қызметтерге уақытылы хабарламауы орын алған.
Осы қатарлы жайттардың әсерінен жедел жәрдем, өрт сөндіру, басқа да апатқа қарсы қызметтердің көліктері өте алмай, уақытылы құтқару, көмек көрсету жұмыстарын жүргізе алмай, тығырыққа тіреліп жатады. Өткізіліп жатқан оқу-жаттығулар және өрттерге шығулар барысында көпқабатты тұрғын үйлердің аулаларындағы Жылу құбырларының төмен орнатылғаны айтылды.
Қала әкімі аталған кедергілерді қалпына келтіру бойынша сала басшыларына жедел тапсырма берді. Бүгінгі таңда, төтенше жағдайлар бөлімінің белгілеген мекен-жайлар бойынша Жылу құбырлары жоғары көтеріліп, жұмыстар орындалды. Көпқабатты тұрғын үйлердің аулаларына рұқсатынсыз қойылған бөгеттер алынып тасталды. Қандай да бір төтенше жағдай орын алған кезде құтқару көлігі кедергісіз жүріп, жағдайдың өршіп кетпеуінің алдын алу қажет.
